ĠOB 26 - Maltese Bible with DC

Kapitlu 26

5“Jirtogħdu fil-qiegħ l-erwieħ tal-mejtin,

il-baħar u kulma jgħammar fih.

6Mikxuf quddiemu l-Imwiet,

xejn ma jistorlu Art it-Telfien.

7Hu jifrex fuq il-vojt tas-smewwiet,

iżomm l-art imdendla fuq ix-xejn.

8Jagħlaq l-ilma fis-sħab tiegħu,

u ma jinfaqax is-sħab bit-toqol tiegħu.

9Hu jgħatti wiċċ il-qamar mimli,

jifrex fuqu s-sħaba tiegħu.

10Ħażżeż ċirku fuq wiċċ il-baħar,

fejn jinferaq id-dawl mid-dlam.

11Il-kolonni tas-sema jirtogħdu,

jitwerwru biċ-ċanfir tiegħu.

12Bil-qawwa ta’ driegħu sikket il-Baħar,

bil-ħila ta’ moħħu saħaq lil Raħab.

13B’nifsu jiċċaraw is-smewwiet,

idu tinfed is-serp ħafif.

14Dawn biss intietef ta’ qawwietu,

tfesfisa dgħajfa li nisimgħu fuqu!

Min jifhmu, mela, r-ragħad ta’ setegħtu?”