1Prinċep għaref jgħallem lil niesu,
u l-għaqli jmexxi bl-ordni.
2Kif inhu mexxej il-poplu,
hekk ikunu l-ministri tiegħu;
u kif inhu l-gvernatur ta’ belt,
hekk dawk kollha li joqogħdu fiha.
3Sultan bla rażan iwassal ’il niesu għat-telfien,
u belt tinbena fuq l-għaqal tal-kapijiet.
4F’idejn il-Mulej hi s-setgħa fuq l-art,
u f’waqtu jqajjem fuqha l-bniedem siewi.
5F’idejn il-Mulej hu s-suċċess tal-bniedem,
u fuq wiċċ il-kittieb iqiegħed il-glorja tiegħu.Il-kburija
6Tagħdabx għall-ġar tiegħek għall-ebda għemil ħażin,
u tagħmel xejn meta inti mgħaddab.
7Il-kburija jistmerruha Alla u l-bniedem,
u l-inġustizzja jistkerrhuha t-tnejn.
8Saltna jgħadduha minn ġens għal ieħor
minħabba l-inġustizzja, il-kburija u l-għana.
9Għaliex jitkabbar min hu trab u rmied
la darba f’ħajtu ntemmu msarnu?
10Marda twila, tidħak bit-tabib:
illum sultan u għada jintemm.
11Meta bniedem imut jiret bhejjem jitkaxkru, annimali selvaġġi u dud.
12Il-bniedem jibda jitkabbar meta jwarrab mill-Mulej
u qalbu titbiegħed mill-Ħallieq tiegħu.
13Il-bidu tal-kburija hu d-dnub,
u min jinħakem minnha jistmerruh;
għalhekk il-Mulej kabbar il-kastigi fuqhom,
u qeridhom għalkollox.
14Il-Mulej tefa’ fl-art tronijiet il-kbarat,
u qiegħed iċ-ċkejknin bilqiegħda minflokhom.
15Il-Mulej qala’ l-ġnus mill-għeruq,
u minflokhom ħawwel l-umli.
16Il-Mulej ħarbat artijiet il-ġnus,
u qeridhom mis-sisien tal-art.
17Warrab ’il xi wħud minnhom u wassalhom għat-telfien,
u temm tifkirithom minn fuq l-art.
18Il-kburija mhijiex magħmula għan-nies;
lanqas l-għadab mill-qalb għall-imwelldin min-nisa.
Nies li jixirqilhom ġieħ19Liema nisel hu mweġġaħ? Nisel il-bniedem.
Liema nisel hu mweġġaħ? Ta’ dawk li jibżgħu mill-Mulej.
Liema nisel hu bla ġieħ? Nisel il-bniedem.
Liema nisel hu bla ġieħ? Ta’ dawk li jiksru l-kmandamenti.
20Qalb l-aħwa għandu ġieħ il-mexxej tagħhom,
u f’għajnejn il-Mulej għandhom ġieħ ukoll dawk li jibżgħu minnu.
21Il-biża’ tal-Mulej hu l-bidu ta’ kull kisba,
u l-bidu ta’ kull ċaħda hu l-ebusija tar-ras.
22L-għani, il-bniedem ta’ ġieħ, u l-fqir:
il-ftaħir tagħhom hu l-biża’ tal-Mulej.
23Mhuwiex sewwa li wieħed jonqos mill-ġieħ lill-fqir għaqli,
u mhuwiex xieraq li wieħed jagħti ġieħ lill-bniedem midneb.
24Bniedem għoli, imħallef, u setgħan jingħatalu ġieħ,
imma ħadd minnhom mhu aqwa minn min jibża’ mill-Mulej.
25L-ilsir għaqli jaqduh nies ħielsa,
u raġel għaref ma jgemgimx.Is-sinċerità u l-umiltà
26Tilgħabhiex tal-għaref meta ttemm xogħlok,
u tintefaħx meta tkun fil-bżonn.
27Aħjar wieħed li jaħdem u għandu ż-żejjed f’kollox
minn wieħed li jdur mimli bih innifsu u m’għandux x’jiekol.
28Ibni, kun ġwejjed meta tfaħħar lilek innifsek,
u agħti ġieħ lilek innifsek skont ma tiswa.
29Lil min jagħti tort lilu nnifsu min se jagħtih raġun?
U min se jġib rispett lil min ikasbar lilu nnifsu?
30Fqir hu mweġġaħ minħabba dak li jaf,
u għani hu mweġġaħ minħabba ġidu.
31Min hu mweġġaħ fil-faqar, kemm iktar fl-għana!
U min hu bla ġieħ fl-għana, kemm inqas fil-faqar!
Who We AreWhat We EelieveWhat We Do
2025 by iamachristian.org,Inc All rights reserved.
