GĦAMOS 3 - Maltese Bible with DC

Kapitlu 3Il-Mulej u Iżrael

1Ulied Iżrael, isimgħu din il-kelma,

li l-Mulej qal kontrikom,

u kontra t-tribujiet kollha,

li jien tellajt minn art l-Eġittu.

Huwa qal,

2“Mir-razez kollha tal-art

ma ridt naf b’ħadd ħliefkom;

għalhekk se nikkastigakom

minħabba l-ħażen kollu tagħkom.

3Forsi tnejn min-nies

se jimxu flimkien jekk ma jiftehmux?

4L-iljun se jriegħed fil-foresta

jekk ma jsibx il-priża?

Il-ferħ tal-ljun

se jsamma’ leħnu fl-għar tiegħu

jekk ma jkun qabad xejn?

5L-għasfur se jaqa’ f’wiċċ l-art,

jekk ma jkunx hemm ix-xbiek?

Se jinqaleb il-mansab mal-art,

jekk ma jkunx hemm x’jaqbad?

6Forsi tindaqq it-tromba fil-belt

u l-poplu ma jibżax?

Se tiġri xi ħsara f’belt,

jekk ma jkunx għamilha l-Mulej?

7Għax ebda ħaġa ma jagħmel Sidi l-Mulej,

jekk ma jurix il-ħwejjeġ moħbija tiegħu

lill-qaddejja tiegħu l-profeti.

8L-iljun jgħajjat: min ma jibżax?

Sidi l-Mulej jitkellem: min ma jħabbarx?”Id-dnubiet ta’ Samarija

9Ħabbru fil-fortizzi tal-Assirja,

u fil-palazzi tal-art tal-Eġittu,

u għidu:

“Inġabru fuq il-muntanji ta’ Samarija u araw:

it-taħwid kbir li hemm ġo fiha,

il-moħqrijiet f’nofsha.

10Jagħmlu s-sewwa ma jafux,

oraklu tal-Mulej,

nies li jrekknu l-vjolenza u s-serq

fil-palazzi tagħhom.”

11Għalhekk dan jgħid Sidi l-Mulej:

“L-għadu għad idawwarlek artek,

ineżżgħek minn qawwietek,

u jisraqlek il-palazzi tiegħek.”

12Dan jgħid il-Mulej:

“Bħalma r-ragħaj jaħtaf minn ħalq l-iljun

xi żewġ saqajn jew xi biċċa widna tan-nagħaġ tiegħu,

daqshekk jeħilsu minn ulied Iżrael

minn dawk li jgħammru f’Samarija,

li jixxaħxħu fl-irkejjen tad-divani,

u s-sufanijiet ta’ Damasku.”

13“Isimgħu u ixhdu kontra dar Ġakobb,

oraklu ta’ Sidi l-Mulej, Alla tal-eżerċti:

14Dakinhar li nikkastiga ’l Iżrael għal dnubietu,

nikkastiga wkoll l-artali ta’ Betel,

jitqaċċtu l-qrun tal-artal tagħha,

u jiġġarrfu fl-art.

15Naħbat għad-dar tax-xitwa

u għad-dar tas-sajf;

u jiġġarrfu l-palazzi tal-avorju,

u jispiċċaw id-djar il-kbar,”

oraklu tal-Mulej.