PROVERBJI 25 - Maltese Bible with DC

Kapitlu 25Proverbji oħra ta’ Salamun

1Dawn ukoll proverbji ta’ Salamun,

miġbura min-nies ta’ Ħeżekija, sultan ta’ Ġuda.

2Hu ġieħ għal Alla li ħaġa jaħbiha;

imma ġieħ għas-slaten li jikxfuha.

3Għolja s-smewwiet u fond qiegħ l-art,

u qalb is-slaten ma titkejjilx.

4Saffi mill-ħmieġ il-fidda,

u tkun tajba għal min jaħdimha;

5neħħi l-ħżiena minn quddiem is-sultan,

u jitwettaq bil-ġustizzja t-tron tiegħu.

6Tersaqx ’il quddiem lejn is-sultan,

toqgħodx fejn joqogħdu l-kbarat;

7għax aħjar jgħidulek: “Itla’ ’l fuq”,

milli jniżżluk ’l isfel quddiem il-kbarat.

Dak li tkun rajt

8ixxandrux malajr quddiem kulħadd,

għax x’tagħmel imbagħad,

meta fl-aħħar għajrek iħammarlek wiċċek?

9Il-kawża tiegħek aqtagħha ma’ għajrek,

imma tikxifx dak li taf fuq ħaddieħor,

10li ma jmurx jgħajrek min jisimgħek,

u t-tebgħa kerha ma tmurx minn fuqek.

11Bħal tuffieħ tad-deheb fuq platt tal-fidda,

hi l-kelma li tingħad f’waqtha.

12Bħal misluta tad-deheb u bħal kullana tad-deheb,

hi t-twissija tal-għaref għal min jismagħha.

13Bħall-frisk tas-silġ fi żmien il-ħsad,

hu l-qaddej fidil għal min jibagħtu;

u hu qalb sidu jserraħ.

14Bħas-sħab u r-riħ bla xita,

hu min jiftaħar li jagħti u ma jagħti qatt.

15Lil min hu kbir bis-sabar tfiehmu,

bil-kelma t-tajba tkisser l-għadam.

16Jekk issib l-għasel, kul kemm teħtieġ;

tikolx iż-żejjed għax ikollok taqilgħu.

17Toqgħodx ġej u sejjer f’dar ġarek,

għax iddejqu u jixba’ minnek.

18Bħal mazza jew sejf jew vleġġa misnuna,

min jixhed ħażin kontra sieħbu.

19Bħal sinna mħassra u sieq imfekka,

min jitma fi bniedem ħajjen fi żmien l-inkwiet.

20Bħal ħall fuq ġerħa

min joqgħod jgħanni lill-qalb muġugħa.

21Jekk l-għadu tiegħek bil-ġuħ, itimgħu;

jekk inhu bil-għatx, isqih;

22hekk tiġmagħlu l-ġamar fuq rasu,

u jkun il-Mulej li jroddlok.

23Kif ir-riħ fuq iġib ix-xita,

hekk l-ilsien li jqassas iġib il-ħars bl-ikrah.

24Aħjar tgħix f’rokna fuq bejt,

milli f’dar kbira ma’ mara ġellieda.

25Bħall-ilma frisk għal min hu bil-għatx,

hekk hi aħbar tajba minn art imbiegħda.

26Bħal nixxiegħa mdardra u għajn imniġġsa,

hu l-ġust li jaqa’ quddiem min hu ħażin.

27Mhux tajjeb tiekol ħafna għasel;

hekk ukoll min ifittex ġieħ fuq ieħor.

28Bħal belt miftuħa u bla ħitan,

hekk hu l-bniedem li ma jitrażżanx.