1L-oraklu kontra Mowab:
“F’lejl wieħed tħarbtet, Għar-mowab inqerdet;
f’lejl wieħed tħarbtet, Kir-mowab inqerdet.
2Telgħet bint Dibon, tibki fuq l-għoljiet
għal Nebo u Medeba, jixher Mowab.
Kull ras imqarwża, kull leħja mqaxxra!
3Fi triqtu lebsin l-ixkejjer,
u fuq bjutu jnewħu,
fil-pjazez tiegħu jixhru bid-dmugħ iġelben!
4U jwerżaq Ħesbon u Elgħali,
għajjathom jinstama’ sa minn Ġaħas.
Għalhekk ġenbejn Mowab jitriegħdu,
u jitħawwad f’ruħu.
5Qalbi tgħajjat għal Mowab;
il-maħrubin tiegħu jiġru lejn Sogħar,
lejn Għeglat-selisija.
Iva, it-telgħa ta’ Luħit jitilgħuha jibku;
iva, fi triq Ħoronajm, jgħajtu għajjat ta’ qsim il-qalb.
6Għax l-ilmijiet ta’ Nimrim saru ħerba,
nixef il-ħaxix, għab l-inbiet,
m’hemm ebda ħdura.
7Għalhekk kulma kisbu, u kulma ħażnu,
għal Wied il-Luq ġarrewh.
8Għax it-twerżiq ġera madwar truf Mowab,
sa Eglajm jidwi x-xhir tagħha,
u l-għajjat sa Bir-elim.
9L-ilmijiet ta’ Dimon mimlija demm,
u għad nissokta nżid kontra Dimon,
l-iljuni għall-maħrubin minn Mowab,
u għal min jibqa’ fil-pajjiż.
Who We AreWhat We EelieveWhat We Do
2025 by iamachristian.org,Inc All rights reserved.
