ĠOB 7 - Maltese Bible with DC

Kapitlu 7Ġob jipprotesta quddiem Alla

1“Ħajjet il-bniedem mhix forsi

xogħol bilfors fuq l-art?

u għomru mhux bħal jiem il-ħaddiem mikri?

2Bħalma lsir jixxennaq għad-dell,

u bħalma l-mikri jistenna l-ħlas,

3hekk xhur fiergħa kienu sehmi,

u ljieli dwejjaq messew lili.

4Jekk nimtedd, ngħid: “Meta se nqum?”

u meta nqum, ngħid: “Meta se jidlam?”

u hekk nixba’ nhewden sa ma jidlam.

5Laħmi ddewwed u mtela qxur,

ġildi nqasmet u tnixxi l-marċa.

6Eħfef minn mekkuk għaddew jiemi,

u bla tama ntemmu.

7Ftakar li ħajti buffura riħ,

u għajnejja ma jerġgħux jaraw ir-risq.

8L-għajn li kienet tarani ma tilmaħnix iżjed,

int twaħħal għajnejk fuqi u jien nispiċċa.

9Bħalma ddub sħaba u ma tidhirx aktar,

hekk min jinżel fil-qabar ma jerġax jitla’;

10qatt iżjed ma jerġa’ lejn daru,

u daru ma tafux aktar.

11Għalhekk m’iniex se nżomm fommi sieket,

irrid niżfoga mid-diqa ta’ ruħi,

ninfexx fit-tgemgim fl-imrar ta’ ħajti.

12Jaqaw jien il-baħar jew il-mostru tal-qiegħ,

biex int tqiegħed għassa fuqi?

13Jekk ngħid: ‘Issa jserraħni friexi,

is-sodda tnaqqasli l-krib tiegħi,’

14hemm int bil-ħolm tiġi taqtagħni

u twaħħaxni bil-fantażmi.

15Għalhekk jagħżel it-tagħliq għonqi,

nippreferi l-mewt għal għadmi.

16M’iniex se ngħix għal dejjem,

ħallini, mela, għax jiemi buffura riħ.

17X’inhu l-bniedem biex int tagħti daqshekk kasu,

twaqqaf ħsiebek fuqu,

18iżżuru kull filgħodu,

u toqgħod tiflih kull waqt?

19Se twarrab ħarstek minn fuqi,

għallinqas sakemm nibla’ r-riq tiegħi?

20Jekk jiena dnibt, x’għamiltlek lilek,

int li tgħarrex b’għajn miftuħa fuq il-bniedem?

L-għala ħadtni b’mira tad-daqqiet tiegħek,

l-għala jien ta’ piż għalik?

21Ma tistax tagħder in-nuqqas tiegħi

u tħalli għaddejja l-ħtija tiegħi?

Għax jien ma ndumx ma nkun mimdud taħt l-art;

Int tfittixni u jiena ma nkunx iżjed.”