BIN SIRAK 50 - Maltese Bible with DC

Kapitlu 50Xmun il-qassis il-kbir

1Kien il-qassis il-kbir Xmun bin Onija,

li tul ħajtu sewwa t-tempju,

u f’jiemu saħħaħ is-santwarju.

2Hu qiegħed is-sisien tal-ħajt għoli u dobblu,

l-ilqugħ għolja li jdawru t-tempju.

3F’jiemu tħaffret ġiebja għall-ilma,

vaska kbira fid-dawra tagħha qisha baħar.

4Ħaseb biex isalva l-poplu tiegħu mill-waqgħa

u saħħaħ il-belt biex tilqa’ għal assedju.

5Kemm kien ikun imsebbaħ bil-poplu madwaru,

meta kien joħroġ mis-santwarju minn wara l-purtiera!

6Bħall-kewkba ta’ filgħodu qalb is-sħab,

bħall-qamar fil-jiem meta jkun mimli;

7bħax-xemx tiddi fuq it-tempju tal-għoli,

u bħall-qawsalla tilma fi sħab jiddi;

8bħal ward fil-jiem tar-rebbiegħa,

bħal ġilji ħdejn nixxiegħa ilma,

bħal żarġuna ta’ inċens fiċ-ċensier;

9bħal nar u inċens fiċ-ċensier;

bħal oġġett tad-deheb battut

imżejjen b’kull xorta ta’ ħaġar prezzjuż;

10bħal siġra taż-żebbuġ li ħarġet il-frott,

u bħal siġra taċ-ċipress għolja sas-sħab.

11Meta kien jitfa’ fuqu l-ilbies tal-glorja,

u kien ikun imlibbes sabiħ għall-aħħar,

meta kien jitla’ l-artal imqaddes,

u kien jimla bil-glorja l-bitħa tat-tempju,

12meta kien jilqa’ l-ishma minn idejn il-qassisin,

wieqaf maġenb il-qiegħa tan-nar tal-artal,

b’ħutu madwaru bħal kuruna,

kien ikun qisu ċedru żgħir tal-Libanu,

u huma madwaru bħalkieku siġar tal-palm;

13meta wlied Aron kollha fil-glorja tagħhom,

bl-offerti tal-Mulej f’idejhom,

weqfin quddiem il-ġemgħa kollha ta’ Iżrael,

14hu u jtemm ir-rit tal-liturġija fuq l-artal,

u kien iħejji bl-ordni l-offerta tal-Għoli li jista’ kollox;

15kien imidd idejh lejn il-bieqja,

u jferragħ minnha meraq tal-għeneb,

kien isawbu man-naħa t’isfel tal-artal;

riħa tfuħ lill-Ogħla, is-sultan ta’ kulħadd;

16imbagħad ulied Aron kienu jgħajtu,

u kienu jdoqqu trumbetti tal-metall battut,

u kienu jagħmlu ħoss kbir li jinstama’ minn kullimkien,

b’tifkira quddiem Alla l-Għoli;

17imbagħad il-poplu kollu f’daqqa

fil-pront jinżel wiċċu mal-art biex jagħti

qima lill-Mulej tiegħu,

lil dak li jista’ kollox, Alla l-Għoli;

18u l-għannejja kienu jgħannu għanjiet ta’ tifħir,

b’leħenhom jidwi f’melodija,

19u l-poplu kien jagħmel talb lill-Mulej, lill-Għoli,

kien jitlob quddiem Dak li hu ħanin,

sa ma jasal fi tmiemu l-ordni taċ-ċelebrazzjoni,

u kienu jtemmu r-rit tal-liturġija;

20imbagħad hu u nieżel Xmun kien jgħolli jdejh

fuq il-ġemgħa kollha ta’ wlied Iżrael

biex minn fommu jagħtihom il-barka tal-Mulej,

imkabbar b’isem il-Mulej;

21u n-nies kienet tinżel tagħti qima għat-tieni darba

biex tilqa’ l-barka mingħand l-Għoli.

Twissija

22U issa bierku lil Alla tal-ħolqien kollu,

li ħwejjeġ tal-għaġeb jagħmel ma’ kullimkien,

li minn ġuf ommna jgħollilna jiemna,

u li jimxi magħna skont ħnientu.

23Jalla jagħtina hena tal-qalb,

u li jkollna s-sliem fi żmienna,

f’Iżrael, bħalma kellna fl-imgħoddi.

24Ħa juri magħna l-ħniena u l-fedeltà

tiegħu, u jifdina fi żmienna.

Qawl numeriku

25B’żewġt iġnus hi mxabba’ ruħi,

u t-tielet wieħed mhu ġens xejn:

26dawk li joqogħdu fuq l-għolja ta’ Xegħir u l-Filistin,

u l-poplu iblah li joqgħod f’Sikem.Għeluq

27Tagħlim ta’ dehen u għerf

jien ktibt f’dan il-ktieb,

Ġożwè bin Sirak, bin Elgħażar, ta’ Ġerusalemm,

li sawwab għerfu minn qalbu.

28Hieni min jedha b’dawn il-ħwejjeġ,

u għaref hu min idaħħalhom f’qalbu!

29Jekk jagħmilhom, ikun jiflaħ għal kollox,

għax dawl il-Mulej ikun il-mogħdija tiegħu.