SALMI 84 - Maltese Bible with DC

Salm 84Xewqa kbira għat-tempju

1Għall-mexxej tal-kor. Fuq “L-Imgħasar”. Salm ta’ wlied Koraħ.

2Kemm hi għażiża d-dar tiegħek,

Mulej tal-eżerċti!

3Tixxennaq u tinfena ruħi għat-tempju tal-Mulej;

ngħanni ferħan b’ruħi u ġismi lil Alla l-ħaj.

4Sal-għasfur isib fejn jgħammar,

u l-ħuttafa ssib il-bejta ħdejn l-artali tiegħek;

hemm hi tqiegħed iż-żgħar tagħha,

Mulej tal-eżerċti, Sultan u Alla tiegħi!

5Henjin dawk li jgħammru f’darek;

huma jfaħħruk għal dejjem.

6Henjin dawk li jsibu fik il-qawwa tagħhom,

li għandhom għal qalbhom il-pellegrinaġġ għat-tempju.

7Huma u għaddejja minn wied niexef,

ibiddluh f’nixxiegħa ta’ ilma;

u x-xita bikrija tbiddlu f’għadajjar.

8Jimxu u aktar jissaħħu,

sa ma jidhru quddiem Alla f’Sijon.

9Mulej, Alla tal-eżerċti, isma’ talbi;

agħti widen, Alla ta’ Ġakobb.

10Ħares, o Alla, lejn it-tarka tagħna,

ħares lejn is-sultan, il-midluk tiegħek.

11Għax jum wieħed fit-tempju tiegħek

aħjar minn elf jum f’post ieħor;

aħjar noqgħod fuq l-għatba ta’ dar Alla tiegħi

milli ngħammar fit-tined tal-ħżiena.

12Għax xemx u tarka l-Mulej Alla,

ħniena u ġieħ hu jagħti lilna.

Ebda ġid ma jiċħad il-Mulej

lil min jimxi bis-sewwa.

13Mulej tal-eżerċti,

hieni l-bniedem li jittama fik!