ISAIJA 34 - Maltese Bible with DC

Kapitlu 34L-għadab ta’ Alla kontra l-ġnus

1Ersqu, ġnus, ħa tisimgħu,

u intom, popli, agħtu widen!

Ħa tisma’ l-art u kulma fiha,

id-dinja u kulma trodd.

2Għax il-Mulej mgħaddab għall-ġnus kollha,

u s-saħna tiegħu fuq l-eżerċti kollha tagħhom.

Qatagħha li lkoll jeqridhom,

u jerħihom għall-qatla.

3Il-maqtula tagħhom jintremew,

u titla’ l-intiena minn ġisimhom.

Iċarċru b’demmhom il-muntanji.

4Il-qtajjiet tas-smewwiet jinħallu,

u s-smewwiet bħal ktieb jitkebbu.

Il-qtajjiet tagħhom jaqgħu,

bħalma jaqa’ l-weraq midbiel mid-dielja

u l-frott misjur mit-tina.

5Għax fis-smewwiet sikret ix-xabla tiegħi,

u għad tinżel fuq Edom,

fuq poplu mitluq għall-qerda,

biex minnu tagħmel ħaqq.

6Ix-xabla tal-Mulej tħammar bid-demm,

tqattar bix-xaħam,

bid-demm tal-ħrief u l-bdabad,

bix-xaħam tal-kliewi tal-imtaten.

Għax ikollu l-Mulej sagrifiċċju f’Bosra,

qatla kbira f’Edom.

7Jaqgħu l-bufli mal-għoġiela smien,

il-gniedes mal-barrin.

Arthom tisker bid-demm,

u trabhom bix-xaħam isir tajn.

8Għax hu jum il-vendetta tal-Mulej,

is-sena tal-ħlas għall-għadu ta’ Sijon.

9Il-widien tiegħu jinbidlu f’qatran.

U trabu f’kubrit.

U artu ssir qatran

10iħeġġeġ lejl u nhar.

Qatt ma tintefa,

id-dħaħen minnha dejjem telgħin.

Tkun ħerba għal dejjem minn żmien għal żmien;

qatt iżjed ma jgħaddu minnha.

11Jirtuha l-pellikan u l-qanfud,

fiha jgħammru l-kokka u ċ-ċawlun.

Il-Mulej jifrex fuqha l-ħabel tal-vojt,

u ċ-ċomb tal-baħħ.

12In-nobbli tagħha ma jkunux aktar,

u slaten aktar ma jipproklamawx,

u prinċpijiet jiġu fix-xejn.

13Fil-palazzi tagħha jinbet ix-xewk;

għollieq u ħurrieq fil-fortizzi tagħha.

Issir kenn għax-xakalli,

u bitħa għan-ngħam.

14Jiltaqgħu hemm il-jena u l-klieb tax-xagħri;

u l-mogħoż selvaġġi jsejħu lil xulxin;

hemm ukoll toqgħod il-kokka tad-deżert,

u ssib il-mistrieħ tagħha.

15Hemm ibejjet is-serp u jbid,

isaħħan u jfaqqas il-bajd.

Hemm ukoll jiltaqgħu l-isqra,

is-sieħeb mas-sieħba tiegħu.

16Fittxu fil-ktieb tal-Mulej u aqraw:

“Ma tonqos ebda waħda minnhom

l-ebda waħda ma titlef lil seħibha.

Għax fommi kkmanda dan.”

L-ispirtu tiegħu li ġabarhom;

17hu li xeħet xortihom,

u idu qassmitilhom l-art bil-ħabel.

Tkun wirthom għal dejjem,

minn ġenerazzjoni għal oħra jgħammru fiha.