PROVERBJI 6 - Maltese Bible with DC

Kapitlu 6La tintrabatx

1Ibni, jekk għamilt tajjeb għal ħaddieħor,

jekk tajt rahan għal min hu barrani,

2jekk inqbadt bi kliem fommok,

u tħabbilt b’xi wegħda li għamilt;

3agħmel dan, ibni, biex issalva,

għax int waqajt f’idejn ħaddieħor;

mur malajr, u ffittah,

4tagħtix mistrieħ lil għajnejk,

lanqas irqad lil xfar għajnejk.

5Eħles bħal għażżiela mix-xibka,

bħal għasfur minn id in-nassab.

La titgħażżinx

6Mur għand in-nemla, ja għażżien,

ara kif tgħix, u tgħallem minnha.

7M’għandhiex min hu fuqha,

la għassies u lanqas ħakem;

8madankollu taħżen ikilha fis-sajf,

tħejji għajxienha fi żmien il-ħsad.

9Kemm se ddum rieqed, ja għażżien?

Meta se tqum minn ngħasek?

10Daqqa torqod, daqqa tongħos,

daqqa tistrieħ b’idejk marbuta,

11u jiġi fuqek bħal ħalliel il-faqar,

u bħal wieħed ġellied l-għaks.

La taqlax ġlied

12Bniedem brikkun, min hu ħażin,

jimxi bit-tagħwiġ ta’ kliemu:

13jegħmeż għajnejh, iħabbat riġlejh,

jagħmel sinjali b’subgħajh,

14moħħu kif se jagħmel il-ħsara,

il-ħin kollu jaqla’ l-ġlied.

15Għalhekk għal għarrieda tiġi fuqu l-ħsara,

f’daqqa waħda jinqered u ma jqumx iżjed.

X’jobgħod Alla

16Sitt ħwejjeġ jobgħod il-Mulej,

sebgħa huma li ma jaħmilhomx:

17għajnejn merfugħa, ilsien giddieb,

idejn li jxerrdu demm bla ħtija,

18qalb li trawwem ħsibijiet qarrieqa,

riġlejn li jiġru ħfief għall-ħażen,

19fomm li jixhed bil-qerq il-gideb,

u bniedem li jaqla’ l-ġlied bejn l-aħwa.

Aħrab il-mara żienja

20Ħares, ibni, ordnijiet missierek,

u twarrbux tagħlim ommok.

21Żommhom dejjem marbutin ma’ qalbek,

dendilhom madwar għonqok.

22Huma jmexxuk fil-mixi tiegħek,

iħarsuk meta tkun rieqed,

ikellmuk meta tqum.

23Għax l-ordni musbieħ u l-liġi dawl,

u t-twiddib tat-tagħlim hu t-triq tal-ħajja.

24Huma jħarsuk minn mart ħaddieħor,

mill-kliem ħelu tal-mara mitlufa.

25Tixxennaqx f’qalbek għal sbuħitha,

tħallihiex taqbdek b’ħarset għajnejha.

26Għax mara żienja b’biċċa ħobż tixtriha,

iżda mara miżżewġa tiswielek ħajtek.

27Jista’ xi ħadd iġorr in-nar f’ħobbu,

u ħwejġu ma jinħarqulux?

28Jista’ xi ħadd jimxi fuq il-ġamar,

u saqajh ma jinxtwewlux?

29Hekk jiġrilu min imur għand mart ħaddieħor;

kull min jersaq lejha jpattiha qares.

30Mhux kulħadd jistmell il-ħalliel,

li jisraq biex jixba’ għax ikun bil-ġuħ?

31Jekk jinqabad, għal seba’ darbiet iħallas,

ikollu jagħti l-ġid kollu ta’ daru.

32Hekk min jiżni hu bniedem bla moħħ,

jeqred lilu nnifsu min jagħmel hekk.

33Swat u mistħija jkollu,

u l-għajb tiegħu ma jitħassar qatt;

34għax l-għira tgħaddab lil żewġha,

li ma jaħfirhilux meta tiġih is-siegħa;

35ma jilqa’ ebda tpattija;

ebda ħlas, kbir kemm ikun kbir, ma jberrdu.