1Ġob raġa’ qabad jitkellem u qal:
2“M’hemmx li nerġa’ għaż-żmien ta’ dari,
għall-jiem meta Alla kien iħarisni,
3meta kienet tiddi fuq rasi l-imnara tiegħu,
u fid-dawl tiegħu kont nofroq id-dlam!
4M’hemmx li nerġa’ għall-aħjar ta’ żmieni,
meta Alla l-Għoli waqqaf l-għarix tiegħi,
5u Xaddaj kien għadu jġibni
u madwari kelli ż-żgħażagħ tiegħi!
6Meta kont naħsel saqajja fil-ħalib u l-balzmu,
u nferragħ fuq riġlejja gliegel ta’ żejt!
7Meta kont noħroġ lejn bieb il-belt
biex nieħu posti fil-misraħ
8iż-żgħażagħ kif jarawni kienu jinħbew,
u x-xjuħ iqumu bilwieqfa.
9Il-kapijiet kien jaqtgħu kliemhom,
u jqiegħdu subgħajhom fuq fommhom.
10Leħen il-kbarat kien jieqaf,
u lsienhom jeħel mas-saqaf ta’ ħalqhom.
11Min kien jismagħni kien iberikni,
min kien jarani kien ifaħħarni.
12Għax kont neħles il-fqir li jittallab l-għajnuna,
u l-iltim li ma kellux min jaqbeż għalih.
13Fuqi kienet tinżel il-barka tal-magħkus,
u l-qalb tal-armla kont inferraħ.
14Ilbist il-ġustizzja u hi libbset lili,
bħal mantar u turbant sarli s-sewwa tiegħi.
15Kont għajn għall-agħma,
u riġel għall-magħtub.
16Kont missier għall-foqra,
u l-kawża ta’ wieħed ma nafux kont nistħarreġ.
17Kont inkisser ix-xedaq tal-kiefer,
u nġagħlu jerħi l-priża minn ħalqu.
18Jien għedt: ‘Fil-bejta tiegħi mmut
wara jiem kotrana daqs ir-ramel.
19Għeruqi nfirxu sa ħdejn l-ilma,
u billejl kelli n-nida fuq il-friegħi.
20Sebħi baqa’ jiġġedded miegħi,
dejjem ġdid il-qaws f’idejja.’
21In-nies kienet tismagħni siekta,
tistenna l-parir mingħandi.
22Wara li nitkellem jien ma kinux jerġgħu huma,
kliemi kien jinżel fuqhom qatra fuq qatra.
23Bħax-xita bikrija kienu jistennew kliemi,
u jixorbuh bħax-xita tar-rebbiegħa.
24Jekk kont nitbissmilhom, ma kinux jemmnu lil għajnejhom,
u l-ferħ ta’ wiċċi xejn ma kienu jitilfu minnu.
25Kont nurihom it-triq qisni rajjes,
kont bħal sultan qalb is-suldati,
fejn immexxihom jien kienu jimxu huma.
Who We AreWhat We EelieveWhat We Do
2025 by iamachristian.org,Inc All rights reserved.
