IL-KTIEB TAL-GĦERF 1 - Maltese Bible with DC

Kapitlu 1Il-ġustizzja l-qofol tal-ħajja

1Ħobbu l-ġustizzja, intom li tmexxu l-art;

aħsbu fuq il-Mulej, kif inhu sewwa,

u fittxuh b’qalb safja;

2għax hu jinstab minn dawk li ma jġarrbuhx,

jingħaraf minn dawk li ma jaqtgħux qalbhom minnu.

3Il-ħsibijiet ħżiena jbiegħdu l-bniedem minn Alla;

u s-setgħa tiegħu, jekk tiġi mġarrba,

tikxef il-bluha ta’ min iġarrabha.

4F’min jagħmel il-ħażin ma jidħolx l-għerf,

lanqas jgħammar f’ġisem marbut mad-dnub.

5Għax l-ispirtu qaddis, li jrawwem fil-virtù, jaħrab minn quddiem il-qerq,

u jwarrab minn fejn hemm ħsibijiet bla sens;

u, meta ssir l-inġustizzja, iċanfar lil min jagħmilha.

6L-għerf hu spirtu li jagħmel il-ġid,

imma ma jaħfirhiex lil min iżeblaħ bi kliem fommu;

għax Alla hu xhud ta’ dak li hu fih innifsu;

hu jagħraf sewwa l-ħsibijiet ta’ qalbu,

u jisma’ l-kliem ta’ fommu.

7Għax l-ispirtu tal-Mulej jimla d-dinja kollha;

hu, li jħaddan kollox, jaf x’jgħidu l-bnedmin.

8Għalhekk ħadd minn dawk li jlissnu l-ħażen ma jista’ jinħeba,

jew jeħlisha mill-ħaqq li jaf jitħallas.

9Ħsibijiet il-ħażen jgħaddu mill-għarbiel,

u leħen kliemu jasal f’widnejn il-Mulej,

biex jixlih quddiemu għal ħżunitu;

10għax din il-widna għajjura kollox tisma’,

u t-tfesfis tat-tgergir ma jinħbilhiex.

11Mela ħarsu rwieħkom mit-tgergir fieragħ,

u mill-kliem ta’ tqassis żommu ’l bogħod ilsienkom;

għax lanqas kelma moħbija ma tibqa’ għaddejja,

u min jgħid il-gideb jeqred lilu nnifsu.

Il-mewt u d-dnub

12Tistednux il-mewt bil-frugħa ta’ ħajjitkom,

tiġbdux għal fuqkom il-qerda b’idejkom stess.

13Għax il-mewt mhux Alla għamilha;

u lanqas togħġbu l-qerda tal-ħajjin.

14Hu ħalaq kollox biex jgħix;

għall-ħajja huma l-ħlejjaq tad-dinja,

m’hemmx fihom velenu tal-mewt.

Is-saltna tal-mewt ma taħkimx fuq l-art,

15għax il-ġustizzja ma taqax taħt il-mewt.

16Iżda l-ħżiena b’għemilhom u bi kliemhom stiednu l-mewt,

għamlu ħbieb magħha, ixxennqu għaliha,

u ntrabtu bi ftehim magħha;

għax tassew tixirqilhom il-kumpanija tagħha.