BIN SIRAK 48 - Maltese Bible with DC

Kapitlu 48Elija

1Imbagħad qam qisu nar Elija, il-profeta,

u kelmtu kienet taqbad bħal ħuġġieġa.

2Hu ġieb fuqhom il-ġuħ,

u fil-ħeġġa tiegħu ċekkinhom fl-għadd.

3B’kelmet il-Mulej għalaq is-smewwiet,

u tliet darbiet niżżel ukoll in-nar.

4Kemm kont imsebbaħ, Elija, f’għeġubijietek!

U min jista’ jiftaħar daqsek?

5Qajjimt mejjet mill-mewt,

minn Art l-Imwiet b’kelmet l-Għoli.

6Tfajt mal-art slaten sa ntilfu

u nies ta’ ġieħ mis-sodda tagħhom.

7Smajt ċanfira fis-Sinaj,

u f’Ħoreb sentenza ta’ kastig.

8Dlikt slaten biex jitħallsu

u profeti biex jilħqu warajk.

9Kont meħud f’riefnu tan-nar

f’karru bi żwiemel tan-nar.

10Int, li kien miktub għalik, li kellek iċċanfar għal żmien,

biex tberred għadab Alla qabel ma jħeġġeġ,

biex iddawwar qalb il-missier lejn ibnu,

u biex terġa’ tqajjem tribujiet Ġakobb.

11Imberkin dawk li jarawk

u dawk li raqdu fl-imħabba;

għax żgur li aħna wkoll ikollna l-ħajja.

Eliżew

12Kien Elija li nħataf minn riefnu

u Eliżew imtela bl-ispirtu tiegħu.

Fi żmienu ma kienx jirtogħod quddiem il-kapijiet,

u ħadd ma ħakem fuqu.

13Xejn ma kien tqil wisq għalih,

sa wara mewtu baqa’ profeta f’qabru.

14F’ħajtu għamel għeġubijiet,

u f’mewtu l-għemejjel tiegħu kienu tal-għaġeb.

Infedeltà u kastig

15Madankollu l-poplu ma nidimx,

u ma reġax lura minn dnubietu,

sakemm ma ġiex itturufnat minn artu,

u mxerred mal-art kollha.

16U kien fadal poplu ta’ ftit nies,

imma b’mexxej mid-dar ta’ David.

Uħud minnhom għamlu dak li jogħġob lill-Mulej,

imma oħrajn kattru dnubiethom.

Ħeżekija

17Ħeżekija saħħaħ beltu,

u daħħal l-ilma fil-qalba tagħha;

ħaffer bil-ħadid fil-blat,

u bena ġwiebi għall-ilma.

18F’jiemu tala’ Sanħerib,

u bagħat lil Rabsaki,

u rafa’ dejh fuq Sijon,

u fi kburitu qagħad jiftaħar.

19Imbagħad bdew jirtogħdu qlubhom u idejhom,

u qabadhom uġigħ bħal ta’ mara fil-ħlas.

20U sejħu lill-Mulej li hu tal-ħniena,

u meddew idejhom lejh.

U l-Qaddis malajr semagħhom mis-sema,

u fdiehom b’id Isaija.

21Laqat il-kamp tal-Assiri,

u qeridhom l-anġlu tiegħu.Isaija

22Għax Ħeżekija għamel dak li jogħġob lill-Mulej,

u żamm sħiħ fi triq David missieru,

kif ordnalu Isaija l-profeta,

li kien kbir u ta’ min jorbot fuqu għad-dehriet li kellu.

23F’jiemu mxiet lura x-xemx,

u tawwal ħajjet is-sultan.

24Bis-saħħa tal-ispirtu ra l-ħwejjeġ tal-aħħar,

u sabbar lill-imnikktin ta’ Sijon.

25Wera x’għandu jiġri sa tmiem iż-żmien,

u ħwejjeġ moħbija qabel ma ġraw.