TOBIT 13 - Maltese Bible with DC

Kapitlu 13Innu ta’ ringrazzjament

1U Tobit qal:

2“Imbierek Alla, li jgħix għal dejjem,

u s-saltna tiegħu!

Jikkastiga u jħenn;

iwasslek sal-qabar f’qiegħ l-art,

u mbagħad jerfgħek mill-akbar qerda.

M’hemm ħadd li jeħles minn idejh.

3Faħħruh, ulied Iżrael, quddiem il-ġnus!

Hu xerridkom f’nofshom.

4U hemm uriekom il-kobor tiegħu.

Għolluh quddiem il-ħajjin kollha.

Hu Sidna, u Alla tagħna!

Hu Missierna, u Alla tagħna,

għal dejjem ta’ dejjem.

5Minħabba dnubietkom jikkastigakom,

imma jħenn għalikom ilkoll;

u għad jiġborkom minn fost il-ġnus kollha,

li f’nofshom tinsabu mxerrda.

6Meta b’qalbkom sħiħa u ruħkom kollha,

terġgħu lura għal għandu,

imbagħad hu jdur lejkom,

u ma jaħbix iżjed wiċċu minnkom.

7Ara x’għamel magħkom!

Faħħruh b’kemm għandkom ħila,

u bierku l-Mulej il-ġust,

u faħħru s-sultan ta’ dejjem.

8Infaħħru jien f’art l-eżilju tiegħi,

u nuri l-qawwa u l-kobor tiegħu lill-ġens midneb.

Erġgħu lura għal għandu, midinbin,

u għamlu l-ġustizzja quddiemu.

Min jaf jilqagħkomx u jħennx għalikom?

9Jiena nkabbar lil Alla tiegħi

u ruħi tfaħħar lis-sultan tas-sema,

u tifraħ bil-kobor tiegħu.

10Ħa jxandru lkoll il-maestà tiegħu,

u jfaħħruh f’Ġerusalemm.

“Ġerusalemm, il-belt qaddisa,

għad jikkastigak minħabba għemil uliedek;

u mbagħad jerġa’ jħenn għal ulied il-ġusti.

11Faħħar kif jixraq lill-Mulej,

u bierek is-sultan ta’ dejjem;

u hekk terġa’ tinbnielek daru bil-ferħ,

12biex jifirħu fik l-itturufnati,

u juri fik imħabbtu għall-imsejknin,

għal dejjem ta’ dejjem.

13“Dawl kbir għad jiddi,

u joħroġ minnek sa truf l-art,

kotra ta’ ġnus għad jiġuk mill-bogħod,

u nies minn kull rokna tad-dinja,

minħabba l-isem qaddis tiegħek,

iġibu r-rigali f’idejhom għas-sultan tas-sema.

Nisel wara nisel jaqbżu bil-ferħ fik,

u isem il-belt magħżula jibqa’ għal dejjem.

14“Misħutin dawk kollha li jitkellmu iebes kontrik;

dawk kollha li jaħbtu għalik;

dawk kollha li jħottu lil ħitanek;

li jġarrfu t-torrijiet tiegħek,

u jagħtu n-nar lil djarek.

U mbierka għal dejjem dawk li jirrispettawk!

15“Ejja, ifraħ b’ulied il-ġusti,

għax ilkoll għad jinġabru,

u jbierku s-Sid ta’ dejjem.

Hienja dawk li jħobbuk,

u hienja dawk li jifirħu bis-sliem tiegħek.

16Hienja n-nies kollha,

li sewdu qalbhom għas-swat li qlajt,

fik għad jifirħu u jaraw il-ferħ tiegħek għal dejjem.

Bierek, ruħi, lill-Mulej, is-Sultan il-Kbir.

17“Ġerusalemm għad jibnuha mill-ġdid, belt fejn jgħammar Alla għal dejjem ta’ dejjem.

Kemm għad nifraħ meta l-fdal ta’ nisli,

jaraw is-sebħ tiegħek,

u jfaħħru s-Sultan tas-sema!

Il-bibien ta’ Ġerusalemm għad jinbnew

biż-żaffir u l-iżmerald;

tal-ħaġar prezzjuż ikunu ħitanek.

Tad-deheb jinbnew it-torrijiet tiegħek;

u l-fortizzi tad-deheb safi.

Il-pjazez ta’ Ġerusalemm

jiċċangawhom b’ħaġar prezzjuż u

ġawhar ta’ Ofir.

18Il-bwieb ta’ Ġerusalemm għad ikantaw innijiet ta’ ferħ;

u djarha lkoll jgħajtu;

‘Ħallelujah! Imbierek Alla ta’ Iżrael!’

Hu jberikhom, u huma jbierku ismu,

qaddis għal dejjem ta’ dejjem.”