1Hieni r-raġel ta’ mara tajba,
l-għadd ta’ jiemu jkun għal darb’oħra aktar.
2Mara qalbiena tferraħ lil żewġha,
u hu jtemm żmienu fis-sliem.
3Mara tajba hi xorti tajba,
tingħata b’sehem lil min jibża’ mill-Mulej.
4Għani jew fqir, għandu hena f’qalbu,
u dejjem wiċċu mbissem.
5Tlieta huma l-ħwejjeġ li qalbi tibża’ minnhom,
u r-raba’ tkexkixni:
qlajja’ f’belt, ġemgħa ta’ kotra nies,
u xili qarrieq - dawn kollha agħar mill-mewt.
6Niket u għali mara għajjura għal oħra,
u swat bl-ilsien daqs dawn kollha.
7Mara ħażina bħal madmad jiċċaqlaq fuq għonq gendus,
min ifittex li jaħkimha
qisu bħal wieħed qabad b’idejh skorpjun.
8Għadab kbir mara fis-sakra,
u l-għajb tagħha lanqas biss tgħattih.
9Iż-żina ta’ mara jidher f’ħarsitha xewqana,
u tingħaraf minn għajnejha.
10Għasses tajjeb fuq bint rasha iebsa,
li ma tmurx issib il-ħelsien u tinqeda bih.
11Għasses għal għajnejha bla mistħija,
u tistagħġibx jekk tonqsok.
12Bħalma wieħed bil-għatx fi triqtu jiftaħ ħalqu
u jixrob minn kull ilma qrib tiegħu,
hekk hi toqgħod bilqiegħda quddiem kull
arblu, u l-barżakka tagħha tiftaħ għal kull vleġġa.
13Mara ta’ ħlewwa tferraħ lil żewġha,
u s-sengħa tagħha ssaħħaħlu għadmu.
14Għotja tal-Mulej mara siekta,
u ruħ imrobbija tajjeb m’hawnx bħalha.
15Mara mistħija ġġib barka fuq oħra,
u m’hawnx prezzha ruħ irżina.
16Bħal xemx tielgħa fl-għoli tas-smewwiet,
hekk hu l-ġmiel ta’ mara sewwa,
f’darha miżmuma bl-ordni.
17Bħal musbieħ jiddi fuq il-kandelabru sagru,
hekk hu wiċċ sabiħ fuq figura nobbli.
18Bħal pilastri mdiehba fuq bażi tal-fidda,
hekk huma riġlejn sbieħ fuq għerieqeb sodi.
19Ibni, żomm b’saħħtu fjur żgħożitek,
u tagħtix lill-barranin saħħtek.
20Fittex art għammiela fil-wita kollha,
u iżra’ ż-żerriegħa tiegħek bil-fiduċja fi tnissilek nobbli.
21U hekk in-nisel tiegħek jibqa’,
u jkun kbir minħabba l-fiduċja li jkollu f’nobbiltu.
22Mara tinkera jistmawha daqs beżqa,
imma mara miżżewġa torri għall-mewt għal dawk li jfittxuha.
23Mara ħażina tingħata b’sehem lill-midneb,
imma waħda twajba tingħata lil min jibża’ mill-Mulej.
24Mara bla mistħija tkasbar ġieħha l-ħin kollu,
imma bint miġbura tistħi saħansitra minn żewġha.
25Mara sfaċċata sa titqies daqs kelb,
imma mara mistħija tibża’ mill-Mulej.
26Mara li tweġġaħ lil żewġha,
kulħadd iqisha mara ta’ għerf,
imma waħda li ma tagħtihx ġieħ,
fi kburitha jqisuha b’mara ħażina.
Hieni r-raġel ta’ mara sewwa,
għax l-għadd ta’ sninu joktru għal darb’oħra aktar.
27Mara tgħajjat u ttaqtaq ħafna
bħal trumbetta tal-gwerra li tfakkar il-ħarba;
u kull raġel f’qagħdiet bħal dawn
jgħaddi ħajtu f’taqlib ta’ gwerra.
Ħwejjeġ li jnikktu28Minħabba tnejn titnikket qalbi,
u minħabba t-tielet nimtela bl-għadab:
li raġel qalbieni jinfena mill-għaks;
li rġiel għaqlin jitwarrbu b’diżunur;
li bniedem iħalli s-sewwa għad-dnub;
jalla bniedem bħal dan jitilqu għax-xabla l-Mulej!
In-negozju29Iebsa għan-neguzjant li jaħrab il-ħażen,
u għall-bejjiegħ li ma jaqax fid-dnub.
Who We AreWhat We EelieveWhat We Do
2025 by iamachristian.org,Inc All rights reserved.
