1L-għerf ifaħħar lilu nnifsu,
u jiftaħar f’nofs il-poplu tiegħu.
2Jiftaħ fommu fil-ġemgħa tal-Għoli,
u jiftaħar quddiem qawwietu.
3“Jien ħriġt minn fomm l-Għoli
u għattejt l-art bħan-nida.
4Tellajt fl-għoli l-għarix tiegħi,
u t-tron tiegħi kien kolonna sħab.
5Waħdi dort id-dawra ta’ fuq is-smewwiet,
u mxejt f’qiegħ l-abbiss.
6Ħadt f’idejja mewġ il-baħar u l-art kollha,
u kull poplu u ġens.
7Fost dawn kollha fittixt fejn nistrieħ
u f’art min immur noqgħod.
8Imbagħad il-Ħallieq ta’ kollox tani ordni,
u dak li ħalaqni għażel post għall-għarix tiegħi,
u qalli: “Tella’ l-għarix tiegħek f’Ġakobb,
u iret sehmek f’Iżrael.”
9Qabel kull żmien, fil-bidu, ħalaqni,
u sal-aħħar taż-żmien ma niġix nieqes.
10Għamiltha ta’ qaddej quddiemu fl-Għarix Imqaddes,
u hekk tqigħedt fis-sod f’Sijon.
11Hekk ukoll qegħedni nistrieħ fil-belt maħbuba,
u s-setgħa tiegħi kienet fuq Ġerusalemm.
12U xenxilt għeruqi f’poplu ta’ ġieħ,
f’sehem il-Mulej, fil-wirt tiegħu.
13Għolejt bħal ċedru tal-Libanu,
u bħal ċipressa fuq l-għoljiet tal-Ħermon.
14Għolejt bħal palma f’Għajn-geddi,
u bħal xtieli tal-ward f’Ġeriko;
bħal żebbuġa l-ġmiel tagħha f’wita,
u bħal dolf għolejt.
15Bħall-kannella u l-akaċja rmejt il-fwejjaħ,
bħall-mirra mill-aħjar sawwabt il-fwieħa,
bħall-galbanu, l-oniċi u l-istoraċ,
u bħad-duħħan tal-inċens fl-għarix.
16Jien bħal terebint frixt il-friegħi tiegħi,
u l-friegħi tiegħi huma friegħi ta’ min jagħtihom ġieħ u jitgħaxxaq bihom.
17Jien bħal dielja tarmi żahar li jiġbdek,
u n-nwar tiegħu jagħmel frott ta’ glorja u ġid.
18 Jien omm l-imħabba safja,
il-biża’ u l-għerf u t-tama qaddisa.
19Ersqu lejja intom li tixtiquni,
u mtlew bil-frott tiegħi.
20Għax tifkirti oħla mill-għasel,
u sehmi minn xehda għasel.
21Min jiekol minni jieħdu l-ġuħ għal aktar,
u min jixrob minni jieħdu l-għatx għal aktar.
22Min jisma’ minni ma jkollux għax jistħi,
u dawk li jaħdmu bija ma jidinbux.L-għerf u l-Liġi
23Dan kollu hu ktieb il-patt ta’ Alla l-Għoli,
il-Liġi li ordnalna nħarsu Mosè,
il-wirt tal-ġemgħat ta’ Ġakobb.
24 Tiqafx tissaħħaħ fil-Mulej;
ingħaqad miegħu biex jagħtik is-saħħa;
il-Mulej li jista’ kollox, hu waħdu Alla,
u m’hemmx salvatur ħliefu.
25Tfawwar il-bniedem bl-għerf bħall-Pison,
jew bħat-Tigri f’jiem il-frott tal-bikri.
26Timlieh bid-dehen bħall-Ewfrat,
u bħall-Ġordan f’jiem il-ħsad.
27It-tagħlim jagħmlu jiddi bħad-dawl,
u bħall-Giħon f’jiem ġbir il-frott.
28Kif l-ewwel bniedem ma kienx jafha sewwa,
hekk ukoll l-aħħar wieħed ma fehemhiex għalkollox,
29għax ħsibijietha kotrana iktar mill-baħar,
u fehmietha iktar fondi mill-abbiss.
L-awtur30U jien bħal kanal ħiereġ minn xmara,
u bħal mogħdija ilma dieħla fi ġnien.
31Għedt: “Insaqqi l-masġar tiegħi,
u nisqi kull roqgħa fil-ġnien tiegħi,”
u ara, il-kanal tiegħi sar xmara,
u x-xmara tiegħi saret baħar.
32It-tagħlim għad nagħmlu jiddi daqs it-tbexbix,
u nwassallu ’l bogħod id-dawl tiegħu.
33It-tagħlim għad insawbu bħal profezija,
u nħallih għal kull nisel tul iż-żminijiet.
34Araw li ma tħabatx għalija biss,
imma għal kull min ifittex it-tagħlim.
Who We AreWhat We EelieveWhat We Do
2025 by iamachristian.org,Inc All rights reserved.
