ISAIJA 41 - Maltese Bible with DC

Kapitlu 41Alla s-Salvatur ta’ Iżrael

1Isktu quddiemi, intom xtut;

u ħalli l-popli jitqawwew mill-ġdid!

Ħa jersqu l-ewwel, imbagħad jitkellmu:

u nersqu għall-ħaqq flimkien!

2Min qajjem mil-Lvant lil dak,

li r-rebħ jiġri wara riġlejh?

Irħielu l-ġnus f’idejh,

biex irażżan is-slaten?

Li b’sejf jagħmilhom trab,

u b’qawsu karfa ttir mar-riħ?

3Jiġri warajhom, u jibqa’ għaddej fis-sliem,

lanqas biss b’riġlejh ma jmiss it-triq.

4Min għamlu u temmu dan?

Min sejjaħ il-ġenerazzjonijiet mill-bidu?

Jiena, il-Mulej,

Jiena l-ewwel, u ma’ tal-aħħar,

jiena hu!

5Jaraw ix-xtut u jibżgħu,

truf l-art jitriegħdu.

Huma resqu u ġew.

6Jgħinu ’l xulxin sieħeb lil ieħor,

u l-aħwa jgħidu lil xulxin:

“Agħmel il-ħila!”

7Il-ħaddied jagħmel il-ħila lil tad-deheb;

min jaħfi bil-martell

lil min iħabbat fuq l-inkwina,

u jgħidu: “Tajba s-saldatura.”

U mbagħad jissudah bl-imsiemer,

biex ma jitħarrikx.

8Imma int Iżrael, il-qaddej tiegħi,

Ġakobb, jien ħtartek,

nisel Abraham, ħabibi.

9Lilek jien qbadtek minn truf l-art,

u sejjaħtlek minn l-ibgħad inħawi tagħha,

u għedtlek: “Int il-qaddej tiegħi,

jiena ħtartek, u ma rmejtikx.”

10La tibżax, għax miegħek jien!

La titħassibx, għax Alla tiegħek jien!

Jiena nwettqek, jiena ngħinek;

inwieżnek bil-leminija rebbieħa tiegħi!

11Ara, għad jistħu u jitriegħxu,

dawk kollha li nkurlaw għalik;

jiġu fix-xejn u jintemmu

n-nies li jħaqquha miegħek.

12Tfittixhom u ma ssibhomx,

in-nies li jeħduha miegħek;

jiġu fix-xejn u jintemmu

n-nies li jitqabdu miegħek.

13Jiena l-Mulej, Alla tiegħek,

inwieżnek minn idek il-leminija,

u ngħidlek: “La tibżax,

jiena l-għajnuna tiegħek.”

14Tibżax, Ġakobb, daqsxejn ta’ dudu fl-art,

intom, bnedmin ta’ Iżrael!

Jiena l-għajnuna tiegħek,

oraklu tal-Mulej,

il-feddej tiegħek, il-Qaddis ta’ Iżrael!

15Arani! Jien nagħmel minnek romblu tad-dris ġdid,

jaqta’ u kollu snien.

Int tidres il-muntanji u tfarrakhom,

u l-għoljiet tagħmilhom tlief;

16int idderrihom u r-riħ iġorrhom,

u r-riefnu jxerridhom.

Imbagħad int tifraħ fil-Mulej,

u tiftaħar bil-Qaddis ta’ Iżrael.

17Il-foqra u l-imsejknin

ifittxu l-ilma u ma jsibux!

Ilsienhom niexef bil-għatx.

Jiena, il-Mulej, nismagħhom,

Jiena, Alla ta’ Iżrael, ma ninsihomx.

18Xmajjar ta’ ilma nfawwar fuq l-għoljiet għerja,

u għejun f’nofs il-widien.

Nibdel id-deżert f’għadira ilma,

u l-art niexfa f’għejun ta’ ilma.

19Inxettel iċ-ċedri fid-deżert,

il-gazzi, u r-riħan, u s-siġar taż-żebbuġ;

intella’ ċ-ċipress fix-xagħri,

u magħhom id-dolf u l-bux;

20biex hekk jaraw u jagħrfu,

jaħsbu u jifhmu wkoll,

li id il-Mulej għamlet dan,

u l-Qaddis ta’ Iżrael ħalqu.

21“Ressqu l-kawża tagħkom,” jgħid il-Mulej,

“Ġibu l-provi tagħkom,” jgħid is-sultan ta’ Ġakobb.

22Ħa jersqu u jgħarrfuna x’se jiġri;

jgħidulna l-imgħoddi x’kien,

biex aħna naħsbu fuqu.

Jew semmgħuna l-ġejjieni

sabiex nagħrfu t-tmiem.

23Għidulna x’se jiġri fl-aħħar,

u nkunu nafu jekk intomx allat.

Agħmlu xi ħaġa, tajba jew ħażina,

u aħna nistagħġbu u nibżgħu fl-istess waqt.

24M’intom xejn u xogħolkom ħrafa;

mistmerr hu min jaħtarkom.

25Jien qajjimt bniedem mit-Tramuntana u hu ġej;

sejjaħtlu b’ismu minn tlugħ ix-xemx:

u jgħaffeġ il-ħakkiema bħalma jgħaffġu t-tajn,

bħalma l-fuħħari jgħaffeġ it-tafal taħt saqajh.

26Min qatt ħabbar sa mill-bidu,

biex aħna nkunu nafu?

Sa minn qabel, biex ngħidu: ‘Veru’?

Qatt ħadd ma qalu;

qatt ħadd ma semmgħu;

qatt ħadd ma sama’ kliemkom.

27Dan l-ewwel għarraftu lil Sijon;

u ’l Ġerusalemm tajtha ħabbar.

28Jien ħarist, ma kien hemm ħadd;

ħadd minnhom biex jagħti parir,

biex nistaqsihom u jwieġbu kelma.

29Ilkoll kemm huma mhuma xejn,

xogħolhom frugħa,

riħ u baħħ xbihat allathom.