PROVERBJI 26 - Maltese Bible with DC

1Bħas-silġ fis-sajf u x-xita waqt il-ħsad,

hekk il-ġieħ lill-iblah ma jixraqlu xejn.

2Bħal għasfur maħrub, bħal ħuttafa tittajjar,

saħta għal xejn b’xejn ma sseħħx fis-sema.

3Il-frosta għaż-żiemel, ir-riedni għall-ħmar,

u l-ħatar għal dahar il-boloh.

4Tweġibx lill-iblah skont bluhatu,

biex ma tkunx bħalu int ukoll.

5Wieġeb lill-iblah skont bluhatu,

biex ma jaħsibx li hu xi għaref.

6Min jibgħat lill-iblah jagħmillu xi qadja,

ikun qed jaqta’ riġlejh u jixrob l-inkwiet.

7Bħar-riġlejn imdendla ta’ wieħed zopp,

hekk proverbju fuq fomm l-iblah.

8Bħal min jorbot iż-żrar mal-iżbandola,

hekk hu min jagħti ġieħ lill-iblah.

9Bħal xewka f’id wieħed fis-sakra,

hu proverbju fuq fomm l-iblah.

10Bħal min itajjar il-vleġeġ fuq kull min jgħaddi,

min jinqeda bl-iblah u s-sakranazz.

11Bħal kelb li jerġa’ jiekol dak li jaqla’,

hekk l-iblah li jtenni bluhatu.

12Qatt rajt wieħed jidhirlu li hu għaref?

Hemm aktar tama għall-iblah milli għalih.

13L-għażżien jgħid: “Hemm iljun fit-triq!

Hemm iljun f’salib it-toroq!”

14Il-bieb idur fuq iċ-ċappetti,

u l-għażżien jitqalleb fuq friexu.

15L-għażżien idaħħal idu fil-platt,

u qajla jreġġagħha lura lejn ħalqu.

16L-għażżien jidhirlu li hu aktar għaref,

minn sebgħa li jafu jwieġbu sewwa.

17Min jindaħal fi ġlied ħaddieħor,

ikun qed jaqbad kelb minn widnejh.

18Bħal wieħed miġnun li jwaddab

xrar tan-nar u vleġeġ tal-mewt,

19hekk min iqarraq b’ħaddieħor,

imbagħad jgħid: “Dan biex niċċajta.”

20Jekk ma jkunx hemm ħatab, jintefa n-nar,

u jekk ma jkunx hemm min isefsef, jieqaf il-ġlied.

21Bħall-faħam għall-ġamar u l-ħatab għan-nar,

hekk il-ġellied biex ikebbes it-tilwim.

22Kliem is-sefsief bħal ikel bnin,

li jinżel sa qiegħ l-istonku.

23Kisja tal-fidda fuq biċċa tal-fuħħar,

huma x-xufftejn ħelwin ma’ qalb qarrieqa.

24Min jobogħdok jinħeba fi kliemu;

f’qalbu jbejjet il-qerq;

25jekk ikellmek bil-ħlewwa, temmnux;

f’qalbu għandu seba’ saħtiet.

26Bil-qerq jaħbi l-mibegħda tiegħu,

imma ħżunitu tinkixef quddiem il-ġemgħa.

27Min iħaffer ħofra jaqa’ ġo fiha,

min igerbeb blata, tinqaleb fuqu.

28Ilsien giddieb jobgħod is-sewwa,

u fomm imelles iwassal għat-tiġrif.