ĠEREMIJA 2 - Maltese Bible with DC

Kapitlu 2L-infedeltà ta’ Iżrael

1U ġietni l-kelma tal-Mulej, u qalli:

2“Mur u għajjat f’widnejn Ġerusalemm, u għidilha:

‘Dan jgħid il-Mulej: ftakart fil-ħlewwa ta’ żgħożitek, fl-imħabba tal-għerusija tiegħek, meta kont tiġri warajja fid-deżert, f’art mhux miżrugħa.

3Iżrael kien ikkonsagrat lill-Mulej, l-ewwel frott tiegħu; dawk kollha li kienu jieklu minnu, kienu jiġbdu fuqhom il-kastig:

il-ħsara kienet taqa’ fuqhom,” oraklu tal-Mulej.

4Isimgħu l-kelma tal-Mulej, dar Ġakobb, u intom il-familji kollha tad-dar ta’ Iżrael.

5Dan jgħid il-Mulej:

“X’nuqqas sabu fija missirijietkom biex tbiegħdu minni,

u mxew wara l-frugħa, u saru huma stess frugħa?

6Ma qalux: ‘Fejn hu l-Mulej

li tellagħna mill-art tal-Eġittu,

li mexxiena fid-deżert,

minn art niexfa u maħruqa,

minn art għatxana u mudlama,

minn art li minnha ħadd ma jgħaddi,

u fiha ma jgħammar ħadd?

7Jien ġibtkom f’art qisha ġnien,

biex tieklu l-frott tagħha

u dduqu l-benna tagħha.

Imma ġejtu u tebbajtuli arti,

waqqajtuli l-wirt tiegħi f’għajb.

8Il-qassisin ma staqsewx: ‘Fejn hu l-Mulej?’

L-għorrief tal-liġi ma għarfunix;

ir-rgħajja dinbu kontrija;

il-profeti ħabbru f’isem Bagħal,

u marru wara ħwejjeġ fiergħa.

9Għaliex inżid nitlewwem magħkom,

oraklu tal-Mulej,

u ma’ wlied uliedkom.

10Baħħru sal-gżejjer ta’ Kittim,

ibagħtu staqsu f’Kedar,

u araw jekk qatt saritx ħaġa bħal din.

11Hemm xi ġens li qatt biddel l-allat tiegħu?

- U dawn mhumiex allat!

Iżda poplu tiegħi bidel il-glorja tiegħu max-xejn!

12Stagħġbu smewwiet b’dan,

tkexkxu fuq li tkexkxu, oraklu tal-Mulej.

13Għax tnejn huma d-dnubiet tal-poplu tiegħi:

telqu lili, l-għajn tal-ilma ġieri,

biex ħaffru bjar għalihom,

bjar miksura li ma jżommux ilma.

14Jaqaw Iżrael xi lsir jew qaddej imwieled fid-dar?

Għaliex, mela, waqa’ priża,

15li għaliha jgargru frieħ l-iljuni,

u jsemmgħu leħenhom?

Artu għamluhielu ħerba,

blietu ħarquhomlu, u sfaw bla nies.

16Saħansitra ulied Nof u Taħfanħes iqaxxrulek rasek.

17Forsi dan ma ġralekx

għax tlaqt lill-Mulej Alla tiegħek,

meta kien qiegħed imexxik fit-triq?

18U issa għalfejn trid tieħu triq l-Eġittu,

biex tixrob l-ilma tan-Nil?

Għalfejn trid taqbad triq l-Assirja,

biex tixrob l-ilma tal-Ewfrat?

19Il-ħażen tiegħek, il-kastig tiegħek;

u ċċanfrek l-infedeltà tiegħek.

Kun af u ara kemm hu ħażin u morr,

li int tlaqt il-Mulej Alla tiegħek;

li ma għandekx aktar twerwir minni,

oraklu ta’ Sidi l-Mulej tal-eżerċti.

20Ilu żmien issa li int kissirt il-madmad tiegħek,

u ħallejt l-irbit tiegħek,

u għedt: ‘Ma nagħtix qima.’

Għax tassew, fuq kull għolja mdaqqsa, taħt kull siġra ħadra,

inti mteddejt u żnejt,

21għad li kont ħawwiltek bħala dielja tajba,

bħala żarġun mill-aħjar.

Kif inbdiltli f’siġra ħażina, dielja bagħlija?

22U jekk titnaddaf bis-soder u b’ħafna lissija,

quddiemi tibqa’ t-tebgħa ta’ dnubietek,

oraklu ta’ Sidi l-Mulej.

23Kif tista’ tgħid: ‘Jien ma tħammiġtx,

ma ġrejtx wara l-Bagħalim’?

Ara, il-passi tiegħek fil-wied:

agħraf x’għamilt!

Ġemla ħafifa sserrep triqatha!

24Ħmara selvaġġa mdorrija fid-deżert

b’leblieba fuqha xxomm ir-riħ;

min se jżommha fis-saħna tagħha?

Min ifittixha ma jitħabatx biex isibha:

malajr issibha fix-xahar tagħha!

25Ħares riġlejk mill-ħafa, u griżmejk mill-għatx!

Imm’int tgħid: ‘Ma jimpurtax!

Jien il-barranin inħobb u warajhom irrid immur!”

26Bħalma jirgħex il-ħalliel meta jaqbduh,

hekk għad jiregħxu dar Iżrael:

huma, is-slaten tagħhom u prinċpijiethom,

il-qassisin u l-profeti tagħhom.

27Lil biċċa għuda jgħidulha: ‘Int missieri!’

u lill-ġebla: ‘Int wilidtni!

Għax huma tawni daharhom,

u ma tawnix wiċċhom!

Imma fi żmien hemmhom jgħajtu:

‘Qum u salvana!’

28Fejn huma l-allat li int għamilt?

Ħa jqumu jekk għandhom ħila

jsalvawk fi żmien hemmek!

Għax daqs għadd blietek, allatek, ja Ġuda!

29“Għaliex toħduha miegħi?

Ilkoll qomtu kontrija,

oraklu tal-Mulej.

30Għalxejn jien drabt ’l uliedek,

it-tagħlima ma ħaduhiex;

ix-xabla tagħkom stess qerditilkom il-profeti,

bħalma jeqred l-iljun il-priża.

31Ja nisel li intom, araw il-kelma tal-Mulej.

Jaqaw kont jien xi deżert għal Iżrael?

Jew xi art mgħargħra fid-dlam?

Għax il-poplu tiegħi qalu:

‘Issa ħlisna, għandek aktar ma niġux.’

32Forsi x-xbejba tinsa l-ġawhra tagħha?

jew l-għarusa l-faxxa tagħha?

Imma l-poplu tiegħi nsieni

għal żmien bla qjies.

33Kemm taf issibha triqtek,

int u tfittex l-imħabba?

Saħansitra lin-nisa ħżiena

għandek ħila tgħallem triqtek.

34Sa fil-kefef ta’ lbiesek

jinsab id-demm ta’ nies bla ħtija,

minkejja li ma qbadthomx jisirqu.

35Imbagħad tgħid: ‘Jiena bla ħtija!

Iva, il-korla tiegħu tbiegħdet minni.’

Arani, se nġibek għall-ħaqq,

talli int għedt: ‘Ma dnibtx.’

36Ah! Kemm waqajt fil-baxx

biex biddilt triqtek!

Quddiem l-Eġittu wkoll għad tħammar wiċċek,

bħalma tħammart quddiem l-Assirja!

37Minn hemm ukoll b’idejk fuq rasek

għad terġa’ lura,

għax il-Mulej rema ’l dawk

li fihom qegħedt it-tama tiegħek;

fihom ir-risq ma ssibx.