1U ġietni l-kelma tal-Mulej u qalli:
2“Int, o bniedem, dan jgħid Sidi l-Mulej lill-art ta’ Iżrael:
‘Wasal it-tmiem!
Wasal it-tmiem għall-erbat itruf tal-pajjiż!
3Issa li wasal tmiemek,
jien nibgħat fuqek qillti,
u nagħmel ħaqq minnek skont imġibtek
u nwaddab fuqek qżiżijietek kollha.
4Għajnejja ma jitħassrukx;
jien ma nħennx għalik!
Għax inwaddab imġibtek fuqek,
u jinkixfu f’nofsok qżiżijietek,
ħalli tkunu tafu li jien il-Mulej!
5Dan jgħid Sidi l-Mulej:
Ħsara, ħsara fuq ħsara, waslet!
6Wasal it-tmiem!
Wasal it-tmiem!
Wasal għalik!
Arah wasal!
7Wasal iż-żmien għalik,
għalik li tgħammar fil-pajjiż!
Is-siegħa tiegħek waslet,
qorob il-Jum,
Jum ta’ għagħa,
u mhux ta’ festi fuq l-għoljiet!
8Issa dalwaqt inferragħ qillti fuqek;
għadbi nserraħ fik;
nagħmel ħaqq minnek skont imġibtek,
u nwaddab qżiżijietek kollha fuqek.
9Għajnejja ma jitħassrukx;
u jiena ma nħennx għalik!
Inħallsek skont imġibtek,
u jinkixfu f’nofsok qżiżijietek,
ħalli tkunu tafu li jien il-Mulej li nsawwat.
10Hawn hu l-Jum.
Arah, wasal!
Waslet sigħetek!
Warrdet l-inġustizzja,
irmiet is-suppervja.
11Il-vjolenza kibret u saret ħatar f’id il-ħażin.
Ħadd minnhom ma jifdal,
la l-għana tagħhom, la ġidhom,
la ġieħhom ma jibqa’ fihom!
12Waslet is-siegħa,
qorob il-Jum!
Ix-xerrej ma jifraħx;
il-bejjiegħ ma jsewwidx qalbu,
għax l-għadab imdendel fuq il-kotra kollha!
13Il-bejjiegħ ma jerġax għal dak li jkun biegħ,
anki jekk stess jibqa’ fost il-ħajjin.
Il-korla kontra l-kotra kollha
ma terġax lura;
u minħabba ħżunitu ħadd ma jsalva ħajtu.
Il-ħsara tal-poplu14“Daqqew it-tromba, tħejja kollox,
imma ħadd ma jmur għall-gwerra.
Għax l-għadab tiegħi fuq il-poplu kollu.
15Ix-xabla barra t-triq,
u l-pesta u l-ġuħ ġewwa d-dar.
Min hu fir-raba’ jmut bix-xabla,
u min hu fil-belt jikkunsmawh il-ġuħ u l-pesta.
16U jekk jaħirbu xi wħud minnhom,
imorru fuq il-muntanji,
ilkoll bħall-ħamiem jokorbu,
kulħadd wieħed għal dnubu.
17Jintelqu d-dirgħajn kollha,
u l-irkupptejn kollha jnixxu l-ilma.
18U jitħażżmu bix-xkejjer,
u jiksihom il-biża’;
il-mistħija fuq kull wiċċ,
u rjushom kollha qargħa.
19Il-fidda jarmuha fit-toroq,
u dehebhom isir bħaż-żibel.
Il-fidda u d-deheb tagħhom ma jeħilsuhomx
f’Jum il-korla tal-Mulej.
Bihom ma jixbgħux griżmejhom,
lanqas timtela żaqqhom,
għax dawn fid-dnub waqqgħuhom.
20Ġmiel il-ġawhar tagħhom serviehom għas-suppervja;
minnhom għamlu x-xbihat moqżieża ta’ allathom.
Għalhekk nagħmilhomlhom żibel,
21u nerħih bi priża f’idejn il-barranin,
u f’idejn il-ħżiena għall-ħatfa, u jniġġsuh.
22U ndawwar wiċċi minnhom,
ħa jniġġsu t-teżor tiegħi,
jidħlu fih il-ħallelin u jipprofanawh,
u jagħmlu minnu l-ktajjen.
Il-profanazzjoni tas-santwarji23“Għax l-art miżgħuda bil-qtil u d-dmija,
u l-belt mimlija bil-vjolenza.
24Inġib fuqhom ġnus mill-agħar,
ħa jeħdulhom djarhom.
Intemm is-suppervja tas-setgħanin,
u nipprofana s-santwarji tagħhom.
25Jasal fuqhom l-hemm,
u jfittxu s-sliem bla ma jsibu.
26Xnigħat waħda fuq oħra jaslu.
Ifittxu xi viżjoni mill-profeti;
il-liġi mingħand il-qassis tgħib,
il-parir jonqos mingħand ix-xjuħ.
27Is-sultan jagħmel il-vistu,
il-prinċep jilbes in-niket,
u idejn il-poplu tal-pajjiż jitriegħdu.
Jien nagħmlilhom skont imġibthom
u skont il-ġudizzji tagħhom nagħmel ħaqq minnhom.
Ħa jkunu jafu li jien il-Mulej.”
Who We AreWhat We EelieveWhat We Do
2025 by iamachristian.org,Inc All rights reserved.
