SALMI 109 - Maltese Bible with DC

Salm 109Talba kontra min ixerred il-kalunji

1Għall-mexxej tal-kor. Salm ta’ David.

O Alla, li jiena nfaħħar, tibqax sieket!

2Għax nies ħżiena u qarrieqa fetħu fommhom kontrija;

tkellmu u gidbu fuqi.

3Bi kliem il-mibegħda dawruni,

għal xejn b’xejn ħaduha kontrija.

4Għad li jien ħabbejthom, huma jixluni;

imma jiena bqajt nitlob.

5Iħallsuni għall-ġid bid-deni,

u għal imħabbti bil-mibegħda.

6Qegħedlu fuqu bniedem ħażin,

ħa jkollu min jixlih fuq lemintu.

7Quddiem il-ħaqq ħa joħroġ ħati,

u t-talba tiegħu titqies bi dnub.

8Ftit ikunu l-jiem ta’ ħajtu,

ħaddieħor jeħodlu xogħlu.

9Ikunu wliedu ltiema,

u martu armla.

10Jiġġerrew u jittallbu wliedu,

jitkeċċew minn djarhom imħarbta.

11Jeħodlu kulma għandu minn silfu,

jaħtaflu l-barrani qligħ xogħlu.

12Ħadd ma juri tjieba miegħu,

ħadd ma jħenn għall-iltiema tiegħu.

13Jinqata’ darba għal dejjem nislu,

f’nisel wieħed jitħassar ismu.

14Titfakkar il-ħtija ta’ missirijietu,

u dnub ommu ma jintesiex:

15ikunu dejjem quddiem il-Mulej,

u tinqered mill-art it-tifkira tiegħu.

16Għax ma ħasibx biex jagħmel il-ħniena,

imma ħabbat l-imsejken u l-fqajjar,

biex joqtol ’il min hu qalbu maqsuma.

17Is-saħta ħabb; u s-saħta tinżel fuqu;

u l-barka li ma ħabbx titbiegħed minnu!

18Hu libes is-saħta bħal libsa;

ħa tidħollu bħall-ilma f’ġismu,

u bħal żejt f’għadmu!

19Tkunlu bħal libsa li tkebbu,

u bħal ħżiem li dejjem iħażżmu.

20Hekk iħallas il-Mulej lil dawk li jixluni,

lil dawk li jgħidu l-ħażin fuqi.

21Imma int, Mulej Sidi, aqbeż għalija f’ġieħ ismek,

eħlisni fil-ħniena u t-tjieba tiegħek.

22Għax jiena msejken u fqajjar,

u qalbi muġugħa ġewwa fija.

23Qiegħed ngħib bħal dell li jgħaddi,

imtajjar qisni ġrad.

24Bis-sawm dgħajfa rkupptejja,

niexef ġismi u magħlub.

25Fuqi waqa’ t-tmaqdir tagħhom,

iħarsu lejja u jħarrku rashom.

26Għinni, Mulej, Alla tiegħi;

salvani fit-tjieba tiegħek.

27Ħa jagħraf li dan hu għemil tiegħek,

li dan, Mulej, int għamiltu.

28Jisħtuni huma, imma int tberikni;

ħa jqumu l-għedewwa u jistħu,

imma jifraħ il-qaddej tiegħek.

29Jitgħattew bit-tmaqdir dawk li jixluni,

jitkebbu bħal b’mantell bil-mistħija.

30Niżżi ħajr ħafna lill-Mulej,

f’ġemgħa kbira ta’ nies infaħħru.

31Għax hu joqgħod fuq il-lemin tal-fqajjar,

biex isalvah minn dawk li jaqtgħuhielu għall-mewt.