PROVERBJI 20 - Maltese Bible with DC

1L-inbid jagħmlek vjolenti, u x-xorb qawwi storbjuż;

mhuwiex għaqli min jingħata għalihom.

2Għadab is-sultan bħal għajta ta’ ljun;

min jiksirha miegħu, hemm ħajtu fin-nofs.

3Hu ġieħ għal bniedem li jitbiegħed mill-ġlied;

kull min hu iblah jistieden it-tilwim.

4L-għażżien ma jaħdimx ir-raba’ fil-ħarifa;

imbagħad għal xejn ifittex fi żmien il-ħsad.

5Il-ħsieb f’moħħ il-bniedem bħall-ilma f’bir fond;

min moħħu jilħaqlu jaf joħroġhulu.

6Ħafna jiftaħru bi tjubithom;

imma min jista’ jsib wieħed sinċier?

7Hu l-ġust li jimxi bir-reqqa;

henjin uliedu li jiġu warajh!

8Sultan li joqgħod fuq it-tron tal-ħaqq,

ixejjen il-ħażen bil-ħarsa t’għajnejh.

9Min jista’ jgħid: ‘Jien qalbi safja;

jien nadif minn ħtijieti?’

10Użin doppju u kejl doppju,

it-tnejn jobgħodhom il-Mulej.

11Imqar tifel jingħaraf minn għemilu,

jekk hux safi u tajjeb f’imġibtu.

12Il-widna li tisma’ u l-għajn li tara,

it-tnejn il-Mulej għamilhom.

13Tħobbx l-irqad, għax tiftaqar;

iftaħ għajnejk, u jkollok ħobż bix-xaba’.

14Imaqdar biss jaf ix-xerrej,

u jmur jiftaħar b’dak li jkun xtara.

15Hemm id-deheb u ħaġar prezzjuż bil-kotra,

imma kliem l-għerf hu egħżeż minnhom.

16Żommlu lbiesu ’l min jagħmel tajjeb għal ħaddieħor,

żommhomlu b’rahan għal min hu barrani.

17Ħelu l-ħobż maqlugħ bis-serq,

iżda mbagħad jimlielek ħalqek biż-żrar.

18Il-ħsibijiet jirnexxu bil-parir tajjeb,

u agħmel il-gwerra wara ħafna ħsieb.

19Min ipaċpaċ ħafna ma jżommx sigriet;

tagħmilhiex ma’ min ilablab wisq.

20Min jisħet ’il missieru u ’l ommu,

jintfielu d-dawl fl-aqwa tad-dlam.

21Il-ġid miksub bl-għaġla mill-ewwel,

ma jkollux barka fi tmiemu.

22Tgħidx: ‘Ħa rrodd id-deni b’deni’

imma stenna li l-Mulej jeħilsek hu.

23Użin doppju jobogħdu l-Mulej,

miżien falz mhux sewwa quddiemu.

24Il-ħajja tal-bniedem imexxiha l-Mulej;

u kif jista’ l-bniedem jifhem triqtu?

25Jidħol f’xibka min jagħmel wegħda bl-għaġla,

għax imbagħad jerġa’ jibdielu.

26Sultan għaref itajjar il-ħżiena,

u minn fuqhom jgħaddi r-romblu.

27Ir-ruħ fil-bniedem hi dawl il-Mulej,

li jgħarrex il-moħbiet kollha tal-qalb.

28It-tjieba u l-fedeltà jħarsuh lis-sultan,

u bil-ħniena jissaħħaħ it-tron tiegħu.

29Il-foħrija taż-żgħażagħ hi saħħithom,

u l-bjuda ta’ xagħarhom il-ġieħ tax-xjuħ.

30Is-swat li jfieri sewwa jfejjaq il-ħsara,

u d-daqqiet inaddfu sa qiegħ il-qalb.