ĠOB 37 - Maltese Bible with DC

Kapitlu 37

1Minħabba f’hekk tħabbat qalbi,

trid taqbeż barra minn postha.

2Isimgħu sewwa ’l leħnu jriegħed,

it-tkarwit ħiereġ minn fommu.

3Ileħħ taħt is-sema kollu l-beraq tiegħu,

u jilħaq l-art minn tarf għal ieħor.

4Wara dan iddamdam ir-ragħda,

il-leħen tal-kobor tiegħu,

u ħadd ma jiflaħ għall-ħsejjes tagħha.

5Iriegħed Alla b’leħnu tal-għaġeb,

jagħmel ħwejjeġ kbar ma nifhmuhomx.

6Hu jgħid lis-silġ: ‘Inżel fuq l-art’,

u lill-ilma tax-xita: ‘Agħmel bil-qliel’.

7Hu jaqfel ġewwa l-bnedmin kollha

biex jagħraf kulħadd li Hu għamel dan.

8U jidħlu l-bhejjem fl-għerien tagħhom,

joqogħdu għall-kenn fil-bejta tagħhom.

9Mill-kamra tan-Nofsinhar joħroġ ir-riefnu,

u l-ksieħ mir-riħ tat-Tramuntana.

10Bin-nifs ta’ Alla jingħata s-silġ,

u l-firxiet tal-ilma bl-infiħ ta’ mnifsejh.

11Ix-xemx tiegħu tiknes iċ-ċpar,

id-dawwala tiegħu tferrex is-sħab.

12U jdur is-sħab ’l hawn u ’l hemm,

ibiddel ir-rotta skont it-tmexxija tiegħu,

u jagħmel kulma jordnalu

fuq wiċċ id-dinja kollha tiegħu.

13Sew b’kastig, jekk ma jobdix,

sew bi ħniena, li jrid hu jsir.

14Isa, Ġob, agħti widen għal dan,

aħseb fuq l-għeġubijiet ta’ Alla!

15Taf xejn kif Alla jrieġi l-ħlejjaq,

kif iġiegħel tberraq is-sħaba tiegħu?

16Taf int kif iżomm fl-ajru s-sħab,

għaġeb ta’ Dak li għerfu perfett?

17Int, li ħwejġek jisħnu fuqek

xħin taqa’ l-kalma bir-riħ isfel,

18frixtha int miegħu l-ħnejja tas-sema,

iebsa daqs mera tal-bronż imdewweb?

19Għarrafna int x’għandna ngħidulu,

għax aħna fid-dlam u ma nsibux kliem.

20Jista’ bniedem jgħid ’l Alla xħin għandu jitkellem

jew iġagħlu jagħmel xi stqarrija?

21Jiġi ħin li d-dawl ma narawhx,

ikun imdallam mis-sħab oħxon.

Iżda mbagħad jonfoħ riħ li jiknishom,

22u tfiġġ dija tad-deheb mit-Tramuntana,

Alla mdawwar b’sebħu tal-biża’.

23Xaddaj li jista’ kollox aħna ma nilħquhx;

Hu għoli fil-qawwa u l-ħaqq,

Hu sid il-ġustizzja, m’għandux iwieġeb.

24Għalhekk għandu kulħadd jibża’ minnu,

u jagħtih qima kull min hu għaref.”