IL-KTIEB TAL-GĦERF 13 - Maltese Bible with DC

Kapitlu 13Il-bluha tal-pagani

1Tassew boloh minn twelidhom dawk kollha li ma għarfux ’l Alla,

u mill-ħwejjeġ tajba li jidhru

ma waslux biex jagħrfu lil Dak li hu;

lanqas għarfu min għamilhom, huma u jarawhom b’għajnejhom.

2Imbagħad in-nar, ir-riħ, l-arja ħafifa,

id-dawra tal-kwiekeb, il-mewġa qawwija,

id-dawl tas-sema li jmexxi d-dinja: lil dawn ħasbuhom allat.

3Jekk ħasbuhom allat, għax tgħaxxqu bi ġmielhom,

imisshom jifhmu kemm hu aħjar minnhom is-Sid tagħhom.

Għax min ħalaqhom hu l-bidu ta’ kull ġmiel.

4Jekk jistagħġbu bil-qawwa u l-ħidma tagħhom,

imisshom jindunaw minnhom kemm hu aqwa dak li għamilhom.

5Għax fil-kobor u l-ġmiel tal-ħlejjaq

jingħaraf, bħal fi xbieha, Dak li jagħmilhom.

6Imma dawn mhuwiex ta’ min ilumhom wisq;

għandhom mnejn ħarġu mit-triq it-tajba,

huma u jfittxu ’l Alla bix-xewqa li jsibuh.

7Ifittxu bir-reqqa l-għemejjel tiegħu;

iżda tħawdu b’dak li raw fihom, daqs kemm huma sbieħ.

8Imma lanqas dawn m’huma ta’ min jagħdirhom.

9Għax jekk setgħu jagħrfu daqshekk,

u jħaddmu moħħhom fuq il-ħolqien,

kif ma sabux aktar malajr is-Sid tiegħu?

Ix-xejn tal-idoli

10Imsieken dawk li t-tama tagħhom hi fi ħwejjeġ mejta,

li jsejħu alla xogħol idejn il-bniedem,

id-deheb u l-fidda, maħduma bis-sengħa, u xbihat ta’ bhejjem,

jew xi ħaġra bla siwi maħduma minn xi ħadd żmien ilu.

11Ikun hemm mastrudaxxa; dan jaqta’ siġra tajba għax-xogħol,

u jneħħilha bir-reqqa l-qoxra tagħha kollha;

imbagħad jaħdimha bis-sengħa tiegħu,

u jagħmel minnha xi ħaġa tajba għall-ħajja ta’ kuljum;

12imbagħad bil-fdal li jibqagħlu minnha,

isajjar iklu, u bih jixba’.

13Xi laqxa oħra tibqa’ li għalxejn ma tkun tiswa,

biċċa għuda mgħawġa u kollha ingroppi,

jaqbadha u joqgħod inaqqaxha biex jgħaddi ż-żmien,

isawwarha bis-sengħa f’ħin il-mistrieħ,

u jagħtiha x-xbieha ta’ bniedem;

14jew iġibha tixbah lil xi bhima bla siwi,

u mbagħad jiżbogħha bin-nogħra,

jgħaddilha fuqha ż-żebgħa ħamra,

u jgħattilha biż-żebgħa kull tebgħa.

15Imbagħad jagħmlilha niċċa kif tixirqilha,

iqegħedha fil-ħajt u jwaħħalha bil-ħadid.

16Jaħsbilha tajjeb biex ma taqax,

billi jaf li ma tistax tgħin ruħha,

għax, tassew, hi biss xbieha li trid min jgħinha.

17Imma lilha jitlob għal ħwejġu, għaż-żwieġ tiegħu u għal uliedu;

mank jistħi jitkellem ma’ ħaġa bla ruħ.

Għas-saħħa jsejjaħ ħaġa bla saħħa;

18għall-ħajja jitlob quddiem ħaġa mejta;

għall-għajnuna jokrob quddiem ħaġa bla ebda ħila;

għall-vjaġġ tajjeb jitlob lil min ma jafx iħarrek riġlu;

19għall-qligħ u għar-riżq ta’ xogħol idejh,

jitlob l-għajnuna ta’ ħaġa b’idejn ma jiswew għal xejn.