IL-KTIEB TAL-GĦERF 8 - Maltese Bible with DC

1Jinfirex minn tarf sa tarf tal-art bil-qawwa,

u jmexxi kollox bil-ħlewwa.

2L-għerf jien ħabbejtu, u fittixtu sa minn żgħożiti;

u fittixt nidħol f’għerusija miegħu,

u tgħaxxaqt bi ġmielu.

3U n-nobbiltà tiegħu tidher fl-għaqda tiegħu ma’ Alla,

u għax lilu jħobb is-Sid ta’ kollox.

4Hu midħla tal-għerf ta’ Alla,

u hu li jagħżel l-opri tiegħu.

5Jekk il-bniedem ifittex il-ġid f’din il-ħajja,

x’hemm aktar għani minnu, li bih jinkiseb kollox?

6U jekk wieħed irid jikseb is-sengħa,

min hu mgħallem aktar minnu fost il-ħlejjaq?

7U jekk xi ħadd iħobb is-sewwa,

it-taħbit tiegħu hu virtù.

Għax hu mgħallem tal-qjies u tal-għaqal,

tal-ġustizzja u tal-qawwa.

Xejn fil-ħajja ma hemm aqwa minn dawn għall-bniedem.

8U jekk wieħed jixxennaq għal esperjenza kbira,

l-għerf jaf l-imgħoddi u jintebaħ bil-ġejjieni.

Jifhem fis-sengħa tad-diskors,

u għandu l-ħila jħoll l-enimmi,

jagħraf is-sinjali u l-għeġubijiet,

u xi jġibu magħhom l-istaġuni u ż-żminijiet.

9Għalhekk qtajtha li nieħdu jgħix miegħi

għax għaraft li hu jkun mexxej tiegħi fil-ġid

u faraġ fl-inkwiet u fl-hemm.

10Bih inkun imsebbaħ fil-ġemgħat tan-nies,

u mweġġaħ mix-xjuħ, għalkemm jien żagħżugħ.

11Bir-reqqa nimxi, meta naqta’ l-ħaqq,

u, xħin jarawni, il-kbarat jistagħġbu.

12Jekk nieqaf nitkellem, jistennewni,

u, xħin niftaħ fommi, jisimgħuni bil-ħerqa;

u jekk indum nitkellem,

joqogħdu jisimgħuni b’idhom fuq fommhom.

13Minħabba fl-għerf nikseb ħajja bla tmiem,

u nħalli lil ta’ wrajja tifkira għal dejjem.

14Naħkem fuq popli u ġnus ikolli taħti.

15Slaten tal-biża’ jibżgħu, kif jisimgħu bija;

twajjeb inkun qalb ġemgħa nies u qalbieni fit-taqbida.

16Malli nidħol f’dari, ħdejn l-għerf nistrieħ;

ma ssibx imrar, int u qiegħed maġenbu;

ma jġiblekx dwejjaq tagħmilha miegħu,

iżda biss ferħ u hena.

17Jien u naħseb dan ġo fija,

u ntella’ u nniżżel ġewwa qalbi,

li fir-rabta mal-għerf hemm ħajja bla tmiem,

18u hena safi fil-ħbiberija miegħu;

li bix-xogħol ta’ jdejh ma jaqta’ qatt l-għana,

li titgħallem mingħandu jagħtik l-għaqal,

u tissieħeb fi kliemu isem ta’ ġieħ,

mort infittex kif se nġibu jgħix miegħi.

19Jien kont tifel xortija tajba,

u lili messet ruħ mill-isbaħ;

20jew aħjar, billi kont tajjeb,

jien dħalt f’ġisem bla tebgħa.

21Billi għaraft li ma stajtx nikseb l-għerf,

jekk ma jagħtihulix Alla

- u dan kien ukoll għaqal li tagħraf ta’ min hu d-don -

mort quddiem il-Mulej u tlabtu bil-ħerqa,

u għedtlu mill-fond ta’ qalbi: