1Jien, Nabukodonosor, kont waħdi f’dari kuntent u sejjer tajjeb fil-palazz tiegħi.
2U rajt ħolma li werwritni; fuq friexi, il-ħsibijiet u d-dehriet ta’ moħħi beżżgħuni.
3U ħriġt digriet biex jinġiebu quddiemi l-għorrief kollha ta’ Babilonja ħalli jgħarrfuni bit-tifsira tal-ħolma.
4Imbagħad ġew il-maġi, il-bassara, il-Kaldin u l-astroloġi u jien għedtilhom il-ħolma, imma t-tifsira tagħha m’għarfux jagħtuhieli.
5Sa fl-aħħar ġie quddiemi Danjel li jismu Beltesassar, bħalma jismu l-alla tiegħi; Danjel għandu fih l-ispirtu tal-allat qaddisa; u jien għedtlu l-ħolma:
8U s-siġra kibret u ssaħħet,
l-għoli tagħha laħaq sas-sema,
u kienet tidher mit-trufijiet kollha tal-art;
9il-weraq tagħha kien sabiħ, u kellha fiha ħafna frott,
hekk li kien fiha biex jiekol minnha kulħadd.
Il-bhejjem tar-raba’ kienu jistkennu għad-dell tagħha,
u l-għasafar tas-sema jgħammru fil-friegħi tagħha,
u l-ħlejjaq kollha kienu jieħdu l-għajxien tagħhom minnha.
10Jiena u nħares fid-dehriet ta’ moħħi fuq friexi, ara mis-sema niżel wieħed għassies u qaddis,
11li għajjat b’leħen qawwi u qal hekk:
‘Qaċċtu s-siġra u aqtgħu l-friegħi tagħha,
farfru l-friegħi u xerrdu l-frott tagħha,
ħalli l-bhejjem jaħarbu minn taħtha
u l-għasafar mill-friegħi tagħha.
12Imma l-fdal li jibqa’ miz-zokk ta’ għeruqha ħalluh fl-art,
miżmum b’ċirku tal-ħadid u l-bronż
qalb il-ħaxix tari tar-raba’,
ħalli jixxarrab bin-nida tas-sema
u jaqsam mal-bhejjem mill-ħaxix tal-art.
13Qalbu ma tibqax bħal tal-bnedmin,
imma tingħatalu qalb ta’ bhima,
u jgħaddu minn għalih seba’ żminijiet!
14Din is-sentenza ngħatat b’digriet tal-għassiesa,
il-kustjoni nqatgħet b’ordni tal-qaddisin,
sabiex il-ħajjin ikunu jafu
li l-Għoli jaħkem fuq is-saltna tal-bnedmin,
u li hu jagħtiha lil min jogħġbu u
jqiegħed fuqha l-iċken fost il-bnedmin.’
15Din hi l-ħolma li jien, is-sultan Nabukodonosor, rajt. U int, Beltesassar, fissirhieli, għax l-għorrief kollha tas-saltna tiegħi m’għandhomx ħila juruni t-tifsira tagħha; imma inti iva, għax int għandek fik l-ispirtu tal-allat qaddisa.”
Danjel ifisser il-ħolma16Imbagħad Danjel, li kien jismu Beltesassar, baqa’ għal waqt wieħed mistagħġeb, u tħawwad fi ħsibijietu. Is-sultan qabad u qallu: “Beltesassar, il-ħolma u t-tifsira tagħha tħallihomx iħawduk.” Wieġeb Beltesassar u qallu: “Sidi, il-ħolma għal dawk li jobogħduk, u t-tifsira tagħha għall-għedewwa tiegħek!
17Is-siġra li int rajt, li kibret u ssaħħet, u għoliet sas-sema hekk li setgħet tidher minn kullimkien fuq l-art;
18li l-weraq tagħha kien sabiħ u l-frott tagħha kotran; li fiha kellha biex jiekol kulħadd, u taħtha nġabru l-bhejjem tar-raba’; u fil-friegħi tagħha sabu l-kenn l-għasafar tas-sema,
19dik is-siġra hija int, sultan, li kbirt u ssaħħaħt, u l-kobor tiegħek tkattar u laħaq is-sema u saltnatek infirxet sa truf l-art.
20“Issa s-sultan ra għassies - u dan kien qaddis - nieżel mis-sema u jgħid: Qaċċtu s-siġra u eqirduha, imma l-fdal li jibqa’ miz-zokk ta’ għeruqha ħalluh fl-art, miżmum b’ċirku tal-ħadid u l-bronż, qalb il-ħaxix tari tar-raba’, ħalli jixxarrab bin-nida tas-sema u jkollu sehmu mal-bhejjem tar-raba’, sa ma jgħaddu seba’ żminijiet.’
21It-tifsira ta’ dan kollu hija din, sultan: hu digriet tal-Għoli għal sidi s-sultan.
22Lilek għad ikeċċuk minn fost il-bnedmin, u l-għamara tiegħek tkun mal-bhejjem tar-raba’; jitimgħuk ħxejjex bħall-barrin; u jħalluk tixxarrab bin-nida tas-sema; seba’ żminijiet jgħaddu minn fuqek, sa ma tagħraf li l-Għoli jaħkem fuq is-saltna tal-bnedmin u li hu jagħtiha lil min jogħġbu., u minn ħżunitek, billi tħenn għall-imsejknin; żgur jitwal għalik żmien ir-risq.”Il-ħolma sseħħ
25Dan kollu seħħ fuq is-sultan Nabukodonosor.
26Tnax-il xahar wara, kien qiegħed jippassiġġa fuq il-bejt tal-palazz tas-Saltna ta’ Babilonja.
27U s-sultan qabad u qal: “Hijiex din Babilonja l-kbira li jien, bil-qawwa ta’ setegħti, bnejt bħala għamara ta’ sultan għal sebħ ġieħi?”
28Il-kelma kienet għadha f’fomm is-sultan meta nstema’ leħen mis-sema: “Seħħ dak li qalu fuqek, sultan Nabukodonosor: is-saltna ħallietek.
29U lilek se jkeċċuk minn fost il-bnedmin, u mal-bhejjem tar-raba’ tkun l-għamara tiegħek; jitimgħuk ħxejjex bħall-barrin; u seba’ żminijiet jgħaddu minn fuqek, sa ma tagħraf li l-Għoli jaħkem fuq is-saltna tal-bnedmin, u li hu jagħtiha lil min jogħġbu.”
30Minnufih il-kelma seħħet fuq Nabukodonosor; tkeċċa minn fost in-nies; kien jiekol il-ħaxix bħall-barrin, u ġismu baqa’ jixxarrab bin-nida tas-sema sa ma xuxtu kibret qisha rix ta’ ajkla u dufrejh sarulu qishom tat-tajr.
31“Meta għadda ż-żmien, jien, Nabukodonosor, erfajt għajnejja lejn is-sema u għaqli raġa’ ġie fija; berikt lill-Għoli, u sebbaħt u tajt ġieħ lil
Dak li hu għal dejjem,
għax setegħtu setgħa għal dejjem,
u saltnatu minn nisel għal nisel;
32dawk kollha li jgħammru fuq l-art huma meqjusa bħax-xejn,
u li jrid hu jagħmel bl-eżerċtu tas-sema
u b’dawk li jgħammru fuq l-art,
u ħadd ma hemm li se jżommlu idu
u jgħidlu, ‘X’qiegħed tagħmel?’
33“Minnufih għaqli raġa’ ġie fija, u għall-glorja ta’ saltnati raġa’ ġieni l-ġieħ u s-sebħ tiegħi; il-kunsillieri u l-kbarat tiegħi fittxewni, tqegħidt fis-saltna tiegħi, u żdiedli kobor liema bħalu.
34Issa jien, Nabukodonosor, infaħħar u ngħolli u nsebbaħ lis-Sultan tas-Sema, għax l-għemejjel tiegħu kollha sewwa u triqatu huma ġusti, u hu għandu s-setgħa jbaxxi ’l dawk li jimxu mkabbra.”
Who We AreWhat We EelieveWhat We Do
2025 by iamachristian.org,Inc All rights reserved.
