BIN SIRAK 31 - Maltese Bible with DC

Kapitlu 31L-għana

1In-nuqqas ta’ rqad minħabba l-għana jherri l-ġisem,

u t-tħassib tiegħu jtajjar in-ngħas.

2It-tħassib biex tgħix ma jħallikx torqod,

bħal marda kiefra jtellfek in-ngħas.

3L-għani jitħabat biex ikattar ġidu,

u meta jistrieħ, jitpaxxa bih.

4Il-fqir jitħabat biex ikollu biex jgħix,

u jekk jistrieħ jiġi fil-bżonn.

5Min iħobb id-deheb ma jibqax fis-sewwa,

u min jiġri wara l-flus joħroġ barra minn triqtu.

6Ħafna ħadu tisbita minħabba d-deheb,

u ħabbtu wiċċhom mat-telfien tagħhom.

7Hu xkiel għal dawk li huma mogħmija bih,

u kull iblah isir ilsir tiegħu.

8Hieni l-għani li jinstab mingħajr ħtija,

u li ma jiġrix wara d-deheb.

9Min hu dan biex infaħħruh,

għax fost niesu għamel ħwejjeġ tal-għaġeb.

10Min kien imġarrab minnu, u baqa’ bla ħtija?

Għandu biex jiftaħar.

Min jista’ jaqbeż il-limiti u ma jaqbiżhomx,

jew jista’ jagħmel il-ħażen u ma jagħmlux?

11Ġidu jkun fis-sod,

u l-opri ta’ ħnientu xxandarhom il-ġemgħa.Il-pranzijiet

12Qiegħed bilqiegħda ma’ mejda għal xi ikla kbira?

Tħallix il-kilba għaliha tegħlbek,

u tgħidx: “Hemm bil-ħala fuqha.”

13Ftakar li mhux sew tħares b’għajn kollha kilba.

X’inħoloq b’kilba akbar mill-għajn?

Għalhekk tnixxi dmugħ minn kull wiċċ.

14Jekk ħaddieħor jitfa’ ħarstu fuq xi ħaġa,

toħroġx idek għaliha,

u trossx fuqu biex taħtaf mill-platt.

15Kun af li dak li tħoss int iħossu għajrek,

u f’kulma tagħmel aħsibha sewwa.

16Kul bħan-nies dak li jitqiegħed quddiemek;

tomogħdux bil-ħatfa, biex ma jmaqdrukx.

17Kun l-ewwel li tieqaf kif titlob l-imġiba tajba,

u tkunx wieħed li qatt ma jixba’, biex ma trigħexx lil xi ħadd.

18U jekk qiegħed bilqiegħda qalb ħafna nies,

tmiddx idek qabilhom.

19Biżżejjed il-ftit għal bniedem imrobbi sewwa!

Fuq soddtu ma jaqtax nifsu.

20Raqda tajba fuq stonku ħafif;

tqum kmieni, u tħossok f’sikktek.

Nuqqas ta’ rqad, tqalligħ,

u brim ta’ msaren,

ibati bihom iż-żaqqieq.

21U jekk kont imġiegħel tiekol ħafna,

qum u mur aqla’, ħa tistrieħ.

22Isma’ minni, ibni, u twarrabnix,

għax fl-aħħar tiġi fi kliemi;

kulma tagħmel, agħmlu bil-qjies,

u ebda marda qatt ma tilħqek.

23In-nies ifaħħru ’l min hu jdejh miftuħa fl-ikel,

ix-xhieda tagħhom hi minnha.

24In-nies imaqdru lil min hu jdejh magħluqa fl-ikel,

ix-xeħħa tiegħu hi flokha.

L-inbid

25Tagħmilhiex ta’ raġel b’saħħtu bl-inbid fih,

għax l-inbid wassal ħafna għat-telfien.

26Il-forġa tistħarreġ l-ebusija tal-azzar,

hekk l-inbid iġarrab il-qlub fit-tilwim tal-kburin.

27L-inbid hu daqs il-ħajja għall-bnedmin,

jekk tixorbu bil-qjies tiegħu.

X’inhi ħajja nieqsa mill-inbid?

Għalhekk kien maħluq,

biex iferraħ lill-bnedmin.

28Hena tal-qalb u ferħ fir-ruħ

meta l-inbid jinxtorob bil-qjies u f’waqtu.

29Imrar ir-ruħ meta l-inbid bl-adoċċ jinxtorob,

waqt tinbix u tfixkil.

30Is-sokor iżid l-herra tal-iblah hekk li jinfixel,

idgħajjiflu ħiltu u jimlieh bil-ġrieħi.

31Fil-laqgħa fejn jinxtorob l-inbid teħodhiex mal-ġar tiegħek,

u tkasbrux fix-xalar tiegħu.

U ċanfira ma tgħidhilux,

u ddejqux b’xi talba tiegħek.