1Ħażin għalihom dawk li jinżlu l-Eġittu għall-għajnuna,
għal dawk li jittamaw fiż-żwiemel;
il-fiduċja tagħhom fil-kotra tal-karrijiet,
u l-qawwa u s-saħħa tar-rikkieba,
imma ma jittamawx fil-Qaddis ta’ Iżrael,
u l-Mulej ma jfittxuhx.
2Imma hu wkoll għaref u jaf iġib id-deni,
u kliemu ma jreġġgħux lura.
Hu jqum kontra dar il-ħżiena,
u kontra min jgħin għemil il-ħażen.
3L-Eġizzjani bnedmin huma, mhumiex Alla,
u ż-żwiemel tagħhom laħam, u mhux ruħ.
Meta l-Mulej imidd idu,
jogħtor min jgħin,
u jaqa’ l-megħjun,
u lkoll flimkien jintemmu.
4Għax dan qalli l-Mulej:
“Bħalma jgħajjat fuq il-priża l-iljun u ferħ l-iljun,
u tinġama’ kontrih il-qatgħa tar-rgħajja,
imma hu ma jibżax mill-għajjat tagħhom,
u anqas jintreħa quddiem il-kotra tagħhom,
hekk jinżel il-Mulej tal-eżerċti,
biex jitqabad fuq il-muntanja ta’ Sijon
u l-għolja tagħha.
5Bħall-għasafar jittajru,
hekk il-Mulej tal-eżerċti
iħares ’il Ġerusalemm,
ikenninha u jħarisha, jaħfrilha u jeħlisha.
6Erġgħu lura għal għand dak li minnu tbegħedtu sewwa,
o wlied Iżrael!
8“U taqa’ l-Assirja b’xabla mhux ta’ bniedem;
u xabla mhux ta’ bniedem tikolha.
Jekk taħrab minn quddiem ix-xabla,
iż-żgħażagħ tagħha jispiċċaw ilsiera.
9Il-fortizza tagħha ddub bil-biża’
u l-fizzjali tagħha mbeżżgħa jħallu l-istendardi.”
Dan hu l-oraklu tal-Mulej,
li għandu n-nar fuq Sijon,
u l-forġa f’Ġerusalemm.
Who We AreWhat We EelieveWhat We Do
2025 by iamachristian.org,Inc All rights reserved.
