IL-KTIEB TAL-GĦERF 16 - Maltese Bible with DC

Kapitlu 16L-Eġizzjani u l-Iżraelin

1Għalhekk bi ħlejjaq bħal dawn int għakkisthom kif kien ħaqqhom,

u bi qtajja’ ta’ dud ikkastigajthom.

2Imma lill-poplu tiegħek, flok kastig ġid tajtu;

biex ittaffilu l-ġuħ bgħattlu s-summien,

ikel bnin li qatt ma kien daq minnu.

3Dan int għamiltu biex l-oħrajn, imxennqin għall-ikel,

wara li ġew fuqhom il-bhejjem moqżieża,

jaqtgħu wkoll l-aptit tal-ikel meħtieġ;

imma l-poplu tiegħek, wara l-ftit żmien tal-ġuħ,

jitpaxxa b’ikel li qatt ma kien daq minnu.

4Hekk kien jixraq li għaks mill-eqqel jaqa’ fuq dawk li ħaqruhom,

biex huma jaraw biss kemm kienu kkastigati l-għedewwa tagħhom.

5Meta darba bhejjem qliel u tal-biża’ daru għall-poplu tiegħek,

u bdew imutu migdumin minn sriep jitkagħwġu,

ma damx sal-aħħar l-għadab tiegħek.

6Bi twiddiba kienu mwerwrin għal żmien qasir;

u kellhom sinjal ta’ salvazzjoni biex ifakkarhom fil-kmand tal-Liġi tiegħek.

7Għax kull min kien idur lejh kien isalva,

mhux b’dak li kien jara, iżda bik li ssalva ’l kulħadd.

8B’dan ukoll int urejt lill-għedewwa tagħna,

li int dak li teħles minn kull deni.

9Lilhom qatilhom il-gdim tal-ġradijiet u tad-dubbien,

u xejn ma sabu li jsalvalhom ħajjithom,

għax kien ħaqqhom kastig bħal dan.

10Imma wliedek lanqas bis-snien tas-sriep kollhom velenu ma ntrebħu,

għax daħlet għalihom ħnientek u fejqithom.

11Kien biex jiftakru fi kliemek li ġew migduma,

u minnufih imfejqa,

li ma jmorrux jinsew għalkollox,

u jwarrbu ħsiebhom mill-ġid li għamiltilhom.

12Għax la fiequ bil-ħxejjex u lanqas bil-ġbajjar,

imma b’kelmtek, Mulej, li kollox tfejjaq.

13Għax int għandek is-setgħa fuq il-ħajja u l-mewt;

int twassal sa bieb il-mewt, u traġġa’ lura.

14Il-bniedem joqtol jista’ bi ħżunitu,

imma ma jistax iġib lura r-ruħ li toħroġ,

lanqas jeħles ruħ magħluqa taħt is-setgħa tal-mewt.

In-nar u l-manna

15Minn idek ħadd ma jista’ jaħrab.

16Għalhekk il-ħżiena li ma ridux jagħrfuk

bi driegħek setgħan inħaqru;

ġew fuqhom tempesti liema bħalhom ta’ xita, silġ u ilma bla ma jaqta’,

u nqerdu għalkollox bin-nar.

17Ħaġa tal-għaġeb, fl-ilma li kollox jitfi,

in-nar ħeġġeġ b’qawwa akbar;

għax id-dinja qamet biex taqbeż għall-ġusti.

18Ġie li l-ilsna tan-nar kienu jiddgħajfu,

biex ma jinħarqux il-bhejjem mibgħuta kontra l-ħżiena,

u hekk dawn jaraw u jintebħu li fuqhom kellhom il-kundanna ta’ Alla.

19Drabi oħra, saħansitra fl-ilma, in-nar qabeż qawwietu,

biex jeqred l-uċuħ tal-art ħażina.

20Flok dan, lill-poplu tiegħek tmajtu b’ikel tal-anġli,

bgħattlu l-ħobż mis-sema, lest għall-ikel bla taħbit,

mogħni b’kull ħlewwa u fih kull togħma.

21Dan l-ikel tiegħek wera l-ħlewwa tiegħek ma’ wliedek;

waqt li kien jaqta’ x-xewqa ta’ min kien jieħdu,

kien jaqbel mal-gosti ta’ kull wieħed.

22Il-borra u s-silġ felħu għan-nar u ma nħallux,

biex huma jagħrfu li uċuħ ir-raba’ tal-għedewwa

nqerdu bin-nar li kien iħeġġeġ qalb is-silġ,

hu u jleħħ il-beraq qalb ix-xita.

23Imma dan in-nar, biex jieklu u jgħixu l-ġusti,

nesa din id-darba l-qawwa tiegħu stess.

24Għax il-ħolqien, li jaqdi lilek li ħlaqtu,

juri qawwietu kollha biex jikkastiga l-ħżiena,

imma jintelaq għall-ġid ta’ min jittama fik.

25Għalhekk dik id-darba wkoll, kien joqgħod għal kull tibdil,

biex jaqdi d-don ta’ tjubitek, li kienet titma’ ’l kulħadd,

kif kienu jixtiequ u jitolbu.

26Hekk, Mulej, uliedek, li int tħobb, jitgħallmu

li mhux b’kull xorta ta’ frott jgħix il-bniedem,

iżda b’kelmtek li żżomm ’il dawk li jemmnu fik.

27Għalhekk il-manna, li ma nqerditx bin-nar,

kienet iddub mas-sħana ta’ daqsxejn ta’ raġġ tax-xemx,

28biex inkunu nafu li għandna niżżuk ħajr qabel titla’ x-xemx,

u lejk induru ma’ tbexbix id-dawl.

29It-tama ta’ min hu ingrat iddub bħall-ġlata tax-xitwa,

u tgħaddi tiġri bħal ilma mhu tajjeb għal xejn.