NEĦEMIJA Ħarsa ħafifa lejn il-ktieb - Maltese Bible with DC

Ħarsa ħafifa lejn il-ktiebTnax-il sena wara li seħħew il-ġrajjiet li naqraw fi tmiem il-Ktieb ta’ Esdra, insibu li Neħemija, kuppier tas-sultan Artasersi fil-Persja, jaslulu aħbarijiet koroh dwar il-belt ta’ Ġerusalemm. Kienu aħbarijiet li sewdulu qalbu tassew u ġegħluh jitlob bil-qalb lil Alla ta’ missirijietu biex iqanqal qalb is-sultan ħalli jibagħtu jibni s-swar tal-belt ta’ Ġerusalemm.It-talba ħerqana tiegħu waslet u l-Mulej tah il-grazzja li s-sultan mhux biss jibagħtu jibni l-belt, talli jipprovdilu wkoll il-materjal li kellu bżonn. Mal-wasla tiegħu f’Ġerusalemm, Neħemija, b’għaqal kbir, daħal b’ruħu u ġismu għall-ħidma tat-tiswija tas-swar tal-belt.Malajr sab xi jfixklu, għax uffiċjali minn pajjiżi madwarhom bdew jinsultaw lil-Lhud u jakkużawhom li riedu jeħduha kontra l-Persja. Għamlu minn kollox biex jaqbdu lil Neħemija fin-nassa tagħhom u joqtluh, imma ma rnexxilhomx. Mhux talli ma ħarbtulux il-ħidma tiegħu, talli fi żmien qasir, is-swar tal-belt kienu lesti u ġew iddedikati lil Alla, li ma ħalla qatt lill-poplu tiegħu.Neħemija għaraf tajjeb li Alla jibqa’ dejjem qrib tal-poplu tiegħu sakemm huma jobduh. F’waħda mit-talbiet tiegħu jgħid hekk:Mulej, Alla tas-smewwiet, Int Alla kbir u tal-biża’, Int iżżomm il-patt u turi ħniena ma’ dawk li jħobbuk u jħarsu l-preċetti tiegħek (1,5).It-taqsim tal-ktiebNeħemija jirritorna Ġerusalemm (1,1—2,20)Jinbnew is-swar ta’ Ġerusalemm (3,1—7,73)Esdra jaqra l-Liġi u l-poplu jġedded il-Patt (8,1—10,39)Ħidma oħra ta’ Neħemija (11,1—13,31)