ĠOB 34 - Maltese Bible with DC

Kapitlu 34Alla ma jgħawwiġx is-sewwa

1Eliħu ssokta jgħid:

2“Isimgħu, għorrief, kliemi,

intom li tifhmu, iftħu widnejkom;

3għax il-widna tiżen il-kliem

bħalma l-ħalq itiegħem l-ikel.

4Ħa nistħarrġu għalina x’inhu s-sewwa,

u naqtgħuha bejnietna x’inhu t-tajjeb.

5Ġob qal: ‘Ġust jien,

iżda Alla ċaħħadni mid-dritt tiegħi.

6Kontra l-ġustizzja jien ħadt it-tort,

midrub jien bil-vleġeġ tiegħu għalkemm bla ħtija.’

7Hawnx bniedem bħal Ġob

jixrob bħall-ilma ż-żebliħ?

8Hu ssieħeb man-nies il-ħżiena,

u jaqbel ma’ dawk ta’ fehmiet mgħawġa.

9Hu stqarr: ‘Xejn ma jiswielu l-bniedem

li jfittex jimxi sewwa ma’ Alla.’

10Imma intom, nies bil-għaqal, isimgħuni:

Ma jistax ikun li Alla jagħmel id-deni,

li Xaddaj jagħmel dak li hu ħażin.

11Għax Hu jħallas il-bniedem skont għemilu,

lil kull wieħed skont ma jġib ruħu.

12Le, Alla qatt ma jaħdem id-dnewwa,

Xaddaj qatt ma jmur kontra l-ġustizzja.

13Min tahielu l-ħakma fuq l-art tiegħu?

Min irħieha fi ħsiebu t-tmexxija tad-dinja?

14Jekk iraġġa’ għal għandu l-ispirtu tiegħu,

u jieħu lura nifs il-ħajja,

15jinqered kull ħaj f’salt wieħed,

u jerġa’ l-bniedem lejn it-trab.

16Issa, jekk għandek għaqal isma’ x’se ngħidlek,

iftaħ widnejk għas-sens ta’ kliemi.

17Jista’ jiggverna min jobgħod is-sewwa?

Trid int tikkundanna l-Ġust innifsu?

18Lil Dak li jgħid lis-sultan: ‘Ja vili’,

u ‘Ja nies ħżiena’ lill-prinċpijiet?

19Hu ma jimxix bil-favuri mal-kbarat,

lanqas jistma l-għani aktar mill-fqir,

għax kollha huma xogħol idejh.

20F’sabta jmutu mqar f’nofs ta’ lejl,

għad-daqqa t’idu jispiċċaw l-għonja,

u jgħibu t-tiranni bla taħbit.

21Għax Alla għajnejh fuq l-imġiba tal-bniedem,

u jiflilu passih kollha.

22M’hemmx dlam lanqas swied,

fejn jista’ jinħeba min jagħmel id-dnewwa.

23Lil ħadd ma jagħti żmien fiss,

biex jersaq quddiemu għall-ħaqq.

24Iġarraf, bla ma jistaqsi, lill-qawwijin,

u jqiegħed oħrajn minflokhom.

25U billi jaf tajjeb għemilhom,

jaqlibhom billejl u jiġġarrfu.

26Ta’ ħżiena li huma jaħbathom,

f’post fejn jistgħu jarawhom,

27talli tbiegħdu minnu,

u warrbu kull twissija tiegħu,

28hekk li ġagħlu l-għajjat tal-fqir jitla’ quddiemu,

u Hu sama’ l-krib tal-maħqurin.

29U jekk jibqa’ ħiemed, min jista’ jagħtih tort?

U min sa jilmħu jekk jaħbi wiċċu?

Iżda fuq ġnus u bnedmin Hu jishar,

30biex la jsaltan wieħed ħażin,

lanqas ma jinstaram il-poplu.

31Issa nagħmluha li wieħed jgħid lil Alla:

‘Tqarraqt, iżda ma nżidx nidneb,

32sa ma nagħraf dan għallimni int,

jekk għamilt id-deni ma nissuktax,’

33taħseb li għandu jħallsu kif jidher lilek,

għax inkella ma toqgħodx għalih?

Għandu jgħid lilek: ‘Int tagħżel, mhux jien’?

Għidli, mela, x’jidhirlek!

34Jgħiduli n-nies bil-għaqal,

u bħalhom jgħid l-għaref li jismagħni:

35‘Ġob ma tkellimx ta’ għaref,

dak li qal kien bla għaqal.

36Iżda Ġob sal-aħħar għandu jiġġarrab

għat-tweġib tiegħu ta’ midgħi.

37Hu jżid dan ma’ dnubietu,

li jiċħad f’wiċċna stess it-tort tiegħu,

u ma jehdiex imaqdar lil Alla.’ ”