IL-KTIEB TAL-GĦERF 2 - Maltese Bible with DC

Kapitlu 2Għajdut tal-midinbin

1Ma ħasbuhiex sewwa, u qalu bejniethom:

“Ħajjitna qasira, u kollha inkwiet;

ma jista’ jsir xejn kontra l-mewt tal-bniedem,

ma nafu b’ħadd li raġa’ lura mill-imwiet.

2Ġejna fid-dinja b’kumbinazzjoni,

u wara mewtna nkunu qisna qatt ma konna;

għax ftit duħħan hu n-nifs fi mnifsejna,

u ħsiebna bħal xrara miżmuma bit-taħbit ta’ qalbna.

3Kif din tintefa, irmied isir ġisimna,

u ruħna tgħib bħall-arja fiergħa.

4Maż-żmien jintesa isimna,

ħadd ma jiftakar f’għemilna.

Ħajjitna tgħaddi bħal ftit fdal ta’ sħaba,

iddub bħal ċpar

milqut mir-raġġ tax-xemx,

u mirbuħ mis-sħana tagħha.

5Dell li jgħaddi hu żmien ħajjitna;

meta jagħlaq, ma jitwalx aktar;

għax magħluq b’siġill, u ħadd ma jerġa’ lura.

6Ejjew, mela, ħa nitpaxxew bil-ġid li għandna,

u b’ħerqa żagħżugħa ninqdew bil-ħlejjaq!

7Ħa jkollna bix-xaba’ nbid mill-ifjen u fwejjaħ;

ma nħallu l-ebda nwara tar-rebbiegħa taħarbilna.

8Inqiegħdu fuq rasna kuruni tal-blanzuni qabel ma jidbielu.

9Ħadd minna ma jibqa’ barra mix-xalar tagħna,

inħallu kullimkien il-marki tal-ferħ tagħna,

għax dan hu sehemna, u din hi xortina.

10Ngħakksu l-fqir u l-ġust;

ma nħennux għall-armla,

u ma nweġġħux ix-xwejjaħ mgħobbi bis-snin.

11Tkun għalina saħħitna l-liġi tas-sewwa;

għax xejn ma jiswa min hu dgħajjef.

12Nonsbulu lill-ġust għaliex hu ta’ xkiel għalina fi triqitna,

hu kontra l-għemejjel tagħna,

iċanfarna għax niksru l-Liġi,

jixlina għax immorru kontra t-tagħlim li ħadna.

13Jgħid li jagħraf ’l Alla,

u jsejjaħ lilu nnifsu ‘Bin il-Mulej’.

14Għalina hu ċanfira tal-fehmiet tagħna;

narawh biss taħt għajnejna, idejjaqna.

15Għax mhijiex bħal tal-oħrajn ħajtu,

u ma tixbah lil ħadd l-imġiba tiegħu.

16Lilna jgħoddna ta’ nies foloz,

jistmell drawwietna bħal ħaġa moqżieża.

Hieni jsejjaħ it-tmiem tal-ġusti,

u jiftaħar li Alla missieru.

17Ħa naraw hux veru kliemu,

naraw fl-aħħar x’se jsir minnu.

18Jekk il-ġust hu iben Alla, jaqbeż għalih Alla,

u jeħilsu minn id l-għedewwa tiegħu.

19Inġarrbuh bit-tagħjir u l-moħqrija,

biex naraw xi tjubija għandu

u nkejlu sa fejn jasal sabru.

20Naqtgħuhielu għall-mewt b’mistħija,

għax, kif jgħid hu, għandu min iħarsu.”

21Hekk ħasbuha, imma tqarrqu;

mogħmija minn ħżunithom.

22Ma fehmux il-ħsibijiet moħbija ta’ Alla,

ma basrux li hemm il-ħlas għall-qdusija,

lanqas m’għarfu li hemm premju għal min hu bla ħtija.

23Għax Alla ħalaq il-bniedem biex ma jmutx,

u għamlu xbieha tiegħu nnifsu.

24Bl-għira tax-xitan daħlet il-mewt fid-dinja;

u jafu xi tfisser dawk li huma tiegħu.