LAMENTAZZJONIJIET 2 - Maltese Bible with DC

Kapitlu 2Il-ġudizzju ta’ Alla

1Kif saħħab f’għadbu

Sidi ’l bint Sijon!

Mis-sema waddab mal-art

il-ġmiel ta’ Iżrael.

U ma ftakarx f’mirfes riġlejh,

f’jum il-korla tiegħu.

2Il-Mulej Sidi, mingħajr ebda ħniena,

qered l-għamajjar kollha ta’ Ġakobb;

fil-korla tiegħu ġarraf

il-fortizzi ta’ Ġuda.

Xeħet mal-art u żeblaħ

is-saltna u l-kbarat tagħha.

3Farrak fis-saħna ta’ għadbu,

il-qawwa kollha ta’ Iżrael;

ġibed lura lemintu

minn quddiem l-għadu.

U xegħel għal Ġakobb bħan-nar iħeġġeġ

u jiekol kulma hemm madwaru.

4Ġibed il-qaws tiegħu bħal għadu,

medd lemintu bħal avversarju,

u qatel kulma jogħġob l-għajn.

Fuq l-għarix ta’ Sijon,

sawwab bħan-nar is-saħna tiegħu.

5Sidi sar qisu l-għadu;

bela’ lil Iżrael;

qered il-palazzi tiegħu,

bela’ l-fortizzi tiegħu,

u kattar lil bint Ġuda

il-krib u t-tnehid.

6Ħarbat bħal ġnien l-għarix tiegħu,

ġarraf il-post tal-festi tiegħu.

Nessa l-Mulej f’Sijon

il-festi u s-sibtijiet.

Stmell, fil-qilla ta’ għadbu,

slaten u qassisin.

7Stkerrah il-Mulej l-artal tiegħu,

ċaħad is-santwarju tiegħu.

Telaq f’idejn l-għedewwa

s-swar u l-palazzi tagħha.

F’dar il-Mulej kien hemm għajjat,

bħal f’jum ta’ festa.

8Il-Mulej għamel ħsieb li jġarraf,

is-swar ta’ bint Sijon.

Medd il-ħabel tal-kejl,

u idu ma waqfitx mit-tiġrif.

Xeħet il-vistu fuq is-sur u l-ħajt quddiemu,

u ġġarrfu t-tnejn f’salt wieħed.

9Bwiebha ntradmu fl-art,

kisser u farrak l-iżbarri tagħha.

Is-sultan u l-prinċpijiet tagħha mxerrda fost il-ġnus.

M’hemmx aktar Liġi,

u l-profeti tagħha wkoll,

m’għandhomx aktar dehriet

mingħand il-Mulej.

10Bilqiegħda fl-art u siekta,

ix-xjuħ ta’ bint Sijon;

it-trab tefgħu fuq rashom,

libsu l-ixkejjer;

u niżżlu rashom fl-art

ix-xebbiet kollha ta’ Ġerusalemm.

11Infnew bid-dmugħ għajnejja,

u qalbi mħawda;

fwiedi mal-art imxerred,

għax bint il-poplu tiegħi ħerba waħda;

u fil-pjazez tal-belt it-tfal u t-trabi

nfnew bla saħħa.

12“Fejn huwa l-ħobż u l-inbid?”

Staqsew lil ommijiethom,

xħin bħal midruba kienu jinfnew

fil-pjazez tal-belt,

u ruħhom kienet ħierġa

fi ħdan ommhom.

13X’naqbad ngħid għalik?

Ma’ min inxebbhek,

bint Ġerusalemm?

Ma’ min inqabblek, u kif nista’ nfarrġek,

xebba, bint Sijon?

Għax kbira l-ġerħa daqs il-baħar,

Min jista’ jfejqek?Il-profeti foloz

14Kellhom għalik dehriet ta’ qerq u frugħa

dawk il-profeti tiegħek,

li ma kixfulekx ħżunitek,

biex jeħilsuk mill-hemm li waqa’ fuqek,

imma qalulek biss dehriet giddieba,

kollha qerq u tagħwiġ.

15Iċapċpulek idejhom

dawk kollha li jgħaddu mit-triq.

Isaffrulek u jxejjru rashom

għal bint Ġerusalemm u jgħidu:

“Din hi l-belt li kienu jgħidulha:

‘Kollha ġmiel, għaxqet id-dinja’.”

16Fetħulek fommhom l-għedewwa kollha tiegħek.

Saffrulek u għażgħżu snienhom,

u bdew jgħajtu: “Blajnieha!

Dan hu l-jum li konna nistennew;

ilħaqnieh u rajnieh!”

17Il-Mulej għamel li kien ħaseb,

il-kelma tiegħu żammha,

li kien lissen sa mill-qedem:

ġarraf bla ma ħenn.

Ferraħ lill-għadu tiegħek bik,

u għolla l-qawwa tal-għedewwa.

18Għajjat lill-Mulej Sidi!

Bint Sijon tniehed,

u xerred lejl u nhar

id-dmugħ bħal xmara.

Mingħajr mistrieħ ta’ xejn,

tħallihomx jieqfu lil għajnejk mill-biki.

19Qum billejl u għajjat

xħin is-sahriet ikunu se jibdew;

xerred bħall-ilma qalbek

quddiem il-Mulej Sidi;

erfa’ idejk lejh u itolbu

għall-ħajja tat-tfal tiegħek,

mifnija bil-ġuħ f’salib it-toroq.

20“Ħares, Mulej, u ara!

Lil min għamilt dan?

Għandhom in-nisa jieklu ’l uliedhom,

it-trabi tad-dirgħajn?

Għandhom jinqatlu fit-tempju ta’ Sidi,

il-qassis u l-profeta?

21Minxura fl-art fil-pjazez

it-tfal u x-xjuħ,

ix-xbejbiet u ż-żgħażagħ tiegħi,

waqgħu mejta taħt ix-xabla.

Qtilthom f’jum is-saħna tiegħek,

Qtilt bla ma ħennejt.

22Int sejjaħt bħal f’jum f’xi festa,

il-biża’ tiegħi minn kullimkien.

U f’jum il-korla tal-Mulej

ma kien hemm ħadd,

li ħarab jew ħelisha.

’Il min qandilt u rabbejt,

qeridhom l-għadu tiegħi.”