ĠOB 24 - Maltese Bible with DC

Kapitlu 24Il-moħqrija tal-imsejkna

1“L-għala Xaddaj iżomm moħbija ż-żminijiet,

u dawk li jħobbuh ma jarawx jiem il-ħaqq?

2Il-ħżiena jneħħu s-sinjali ta’ qsim l-għelieqi,

jisirqu l-imrieħel u jirgħuhom huma.

3Jieħdu l-ħmar tal-iltim,

u jżommu b’rahan il-barri tal-armla.

9Jaħtfu l-iltim minn sider ommu

u jżommu b’rahan it-tifel tal-fqir.

4Ikeċċu mit-triq tagħhom l-imsejkna,

u l-fqar tal-pajjiż ikollhom jinħbew.

5Bħal ħmir fix-xagħri joħorġu

jitħabtu ħa jsibu l-ikel tagħhom,

ix-xagħri jitmgħalhom ’l uliedhom.

6Jaħsdu għelieqi li mhumiex tagħhom,

ilaqqtu mid-dwieli tal-għonja.

7Jgħaddu l-lejl għerja mingħajr għata,

m’għandhomx ilbies x’jilqgħalhom il-ksieħ.

8Jixxarrbu għasra bix-xita tal-muntanji,

jitrekknu mal-blat għax m’hemmx fejn jistkennu.

10Jiġġerrew għerja mingħajr ilbies,

imorru bil-ġuħ bil-qatet f’idejhom.

11Jisħqu fil-magħsar iż-żebbuġ,

jagħsru l-għeneb, u mejta bil-għatx.

12Fil-belt jokorbu dawk li qed imutu,

griżmejn il-feruti jgħajtu għall-għajnuna,

u Alla ma jagħtix kas tat-talba tagħhom.

13Hemm uħud li rvillaw għad-dawl,

li ma jridux jafu bi triqatu

u f’mogħdijietu ma jżommux.

14Iqum qabel jisbaħ l-assassin,

biex joqtol il-fqir u l-imsejken.

Billejl iħuf il-ħalliel,

16ajiżgassa d-djar fis-satra tad-dlam.

15Iż-żieni wkoll jistenna d-dlam,

jgħid lilu nnifsu: “Ħadd ma jarani”,

u jqiegħed maskra ma’ wiċċu.

16bBinhar jinqaflu ġewwa

dawn li ma jridux jafu bid-dawl.

17Għalihom ilkoll dlam hi l-għodwa,

malli jisbaħ jaqbadhom il-biża’.

25Jekk mhux hekk min ġej igiddibni,

u jġib fix-xejn l-argument tiegħi?”