PROVERBJI 16 - Maltese Bible with DC

1Il-bniedem jista’ jfassal ħsibijietu,

imma l-Mulej iqegħedlu l-kliem fuq ilsienu.

2Kulma jagħmel il-bniedem hu safi f’għajnejh,

imma l-Mulej jaf x’tiswa qalbu.

3Ħalli f’idejn il-Mulej il-ħidma tiegħek,

u jseħħu ħsibijietek.

4Kulm’għamel il-Mulej, għamlu bi ħsieb,

saħansitra l-ħażin għal jum il-hemm.

5Il-Mulej jistmell lil kull min hu mkabbar;

illum jew għada, ma jeħlishiex.

6Bit-tjieba u l-fedeltà tpatti għall-ħtija;

u bil-biża’ tal-Mulej taħrab il-ħażen.

7Min jogħġob lill-Mulej bl-imġiba tiegħu,

ukoll mal-għedewwa jżomm is-sliem.

8Aħjar il-ftit bis-sewwa,

minn ħafna qligħ bl-inġustizzja.

9Il-bniedem jaħseb u jfassal triqtu,

imma l-Mulej imexxih minnha.

10Il-kelma ta’ Alla fuq fomm is-sultan,

ma jiżbaljax, hu u jaqta’ l-ħaqq.

11L-istasija u l-miżien huma tal-Mulej,

xogħlu, kull użin, li jinżamm fil-borża.

12Hu għajb għas-slaten li jagħmlu d-deni,

għax it-tron tagħhom fuq il-ġustizzja biss iserraħ.

13Kliem il-ġust jogħġob lis-slaten;

huma jħobbu lil min jgħid is-sewwa.

14L-għadab ta’ sultan sinjal tal-mewt,

u l-bniedem għaref jaf iberrdu.

15Wiċċ hieni ta’ sultan jagħtik il-ħajja,

u ħnientu bħal sħaba xita tar-rebbiegħa.

16Li tikseb l-għerf aħjar mid-deheb,

li tikseb id-dehen aħjar mill-fidda.

17Triq il-ġusti mhijiex triq il-ħażen;

min iħares triqtu jsalva ħajtu.

18Qabel il-qerda tiġi l-kburija,

u qabel il-waqgħa t-tkabbir.

19Aħjar tiċċekken mal-fqajrin,

milli taqsam il-priża mal-kburin.

20Min jagħti widen għall-Kelma jmur tajjeb;

hieni hu min jafda fil-Mulej!

21Min għandu d-dehen hu bniedem bil-għaqal,

min jitkellem bil-ħlewwa hu qawwi fi kliemu.

22Min għandu l-għerf għandu għajn tal-ħajja,

imma l-boloh jissawtu bi bluhathom.

23Moħħ l-għaref iqegħedlu l-għaqal fuq fommu,

u jkattarlu l-qawwa ta’ kliemu.

24Il-kliem ħelu bħal xehda għasel,

hu ħlewwa tar-ruħ u saħħa tal-ġisem.

25Hemm min jaħseb li triqtu dritta,

imbagħad tmiemha jwasslu għall-mewt.

26Il-ħaddiem jaħdem għax irid jiekol,

għax il-ġuħ iġiegħlu jaħdem.

27Min ma jiswa għal xejn ħsara biss jagħmel,

kliemu hu bħal nar iħeġġeġ.

28Min iħobb l-inkwiet iġib il-ġlied,

u min ifesfes jifred il-ħbieb.

29Il-bniedem vjolenti jiġbed lil għajru miegħu,

u jqabbdu triq ħażina.

30Min jagħmeż għajnejh jaħseb il-ħażin,

min iross xufftejh jistieden id-deni.

31Ix-xagħar abjad kuruna ta’ ġieħ,

li tinkiseb b’ħajja tajba.

32Min għandu s-sabar aħjar mill-qalbieni,

min jitrażżan aħjar mir-rebbieħ ta’ belt.

33Ix-xorti tintafa’ f’ħoġorna,

iżda hu l-Mulej li jtellagħha.