ĠOB 14 - Maltese Bible with DC

3U fuq dan jixraqlek iżżomm għajnejk miftuħa

u ssejjaħlu quddiemek għall-ħaqq?

4Xi ħadd, mela, jista’ jislet is-safi mill-imniġġes?

Ħadd!

5La darba jiemu magħdudin,

la darba l-għadd tax-xhur qiegħed f’idejk,

u ħażżiżtlu tarf li ma jistax jaqbżu,

6warrab għajnejk minn fuqu,

u ħallih itemm il-jum tiegħu bħal ħaddiem mikri.

7Siġra għallinqas għandha tama,

li jekk tinqata’ terġa’ ttella’,

u ma jiġux nieqsa ż-żraġen tagħha.

8Imqar jixjieħu fl-art għeruqha,

u jinxef fit-trab iz-zokk tagħha,

9kif tħoss l-ilma terġa’ tarmi,

u tagħmel il-friegħi bħal xitla ġdida.

10Iżda l-bniedem imut u jispiċċa;

xħin toħroġ ruħu fejn ikun?

11Bħalma jinxtorob l-ilma mill-baħar,

jew tinxef xmara u titqaxqax,

12hekk il-bniedem li jmut, ma jqumx aktar,

sa ma jintemmu s-smewwiet ma jistenbaħx,

le, ma jqumx mir-raqda tiegħu.

13Mhux li kont taħbini f’Art l-Imwiet

fejn nistkenn sa ma tibred il-korla tiegħek

u tiffissali żmien li tiftakar fija.

14Li kien jista’ bniedem imut u jerġa’ għall-ħajja,

iż-żmien kollu tas-servizz tiegħi kont nissaporti

sa ma jasal il-waqt tal-bidla tiegħi.

15Kont tgħajjatli u jiena nwieġbek,

kont titgħaxxaq bl-opra ta’ jdejk.

16Ma kontx tgħoddli l-passi tiegħi,

lanqas tgħassisli għal dnubieti,

17kont tissiġilla f’sorra l-ħtija tiegħi,

u tiksi bil-ġir il-ħżunija tiegħi.

18Bħalma tittiekel muntanja u tiġġarraf

u jitqanqal minn postu l-blat,

19bħalma jiekol l-ilma l-ġebel,

u jiknes l-għargħar il-ħamrija,

hekk int ixxejjen it-tama tal-bniedem.

20Int iżżarmah u hu jitlaq għalkollox,

tħassarlu surtu u tibagħtu.

21Jekk jiksbu ġieħ uliedu, hu ma jkunx jaf,

jekk jaqgħu fl-għajb, lanqas jintebaħ.

22Għalih biss ibati ġismu,

għalih waħdu titniehed ruħu.”