1Xmun sama’ li Trifon kien ġabar eżerċtu kbir biex jidħol f’art Ġuda u jagħmilha ħerba.
2Kif ra l-poplu mwerwer u maħkum mill-biża’, tela’ Ġerusalemm, ġabar il-poplu kollu
3u għamlilhom il-qalb u qalilhom: “Intom stess tafu x’għamilna aħna, jiena u ħuti, u dar missieri għal-liġijiet u t-tempju mqaddes, u l-gwerer u t-taħbit li rajna ma’ wiċċna.
4Minħabba dan kollu ħuti kollha mietu għal Iżrael, u bqajt jien waħdi.
5Issa, mela, ma jkun qatt minni li nibża’ għal ħajti f’dan iż-żmien kollu ta’ hemm. Għax jien m’iniex aħjar minn ħuti.
6Jien irrid nitħallas għal li sar lil ġensi, lit-tempju mqaddes, lin-nisa u t-tfal tagħkom, għaliex il-Ġentili kollha ftiehmu bejniethom biex jeqirduna għax jobogħduna.”
7U reġgħet xegħlet qalb il-poplu malli semgħu dan il-kliem,
8u wieġbu b’leħen għoli u qalulu: “Kun int il-mexxej tagħna minflok Ġuda u ħuk Ġonatan.
9Iġġieled il-battalji tagħna, u aħna nagħmlu kulma tgħidilna.”
10U ġabar l-irġiel kollha tal-gwerra, ħaffef biex ilesti s-swar ta’ Ġerusalemm, u saħħaħha dawramejt.
11Imbagħad bagħat lil Ġonatan bin Absalom b’eżerċtu qawwi biżżejjed Ġaffa, u dan keċċa n-nies tagħha ’l barra u baqa’ fiha hu.
12Trifon telaq b’eżerċtu kbir minn Ptolemajs biex jidħol f’art Ġuda, b’Ġonatan priġunier miegħu.
13Xmun waqqaf il-kamp f’Adida biswit il-wita.
14Trifon, malli sar jaf li Xmun laħaq flok ħuh Ġonatan u li kien lest jaħbat għalih, bagħat messaġġiera jgħidulu:
15“Lil ħuk Ġonatan żammejnieh f’idejna minħabba l-flus li kellu jagħti lit-teżor tas-sultan tal-uffiċċji li kellu.
16Mela issa ibgħat mitt talent tal-fidda u tnejn minn uliedu b’rahan biex ma jmurx idur kontrina wara li nkunu ħlisnieh. Imbagħad nitilquh.”
17Xmun induna li dan kien kliem biex jingannah, imma bagħat iġib il-flus u t-tfal, biex ma jnissilx mibegħda bejnu u bejn il-poplu u jgħidu:
18“Inqered Ġonatan għax ma bagħatlux il-flus u t-tfal.”
19U bagħatlu t-tfal u l-mitt talent, imma dak kiser kelmtu, u ma telaqx lil Ġonatan minn taħt idejh.
20Wara dawn il-ġrajja Trifon ġie biex jidħol fil-pajjiż u jagħmel ħerba minnu; u daru miegħu u qabdu t-triq lejn Adora, imma Xmun u l-eżerċtu tiegħu baqgħu jsusu warajh kull fejn imur.
21Dawk li kienu fl-Akra bagħtu messaġġiera lil Trifon biex jgħaġġluh jiġi għandhom mid-deżert u jibagħtilhom l-ikel.
22Trifon ħejja l-kavallerija kollha biex imur, imma dak il-lejl għamel ħafna silġ, u minħabba fih ma setax imur. Għalhekk rafa’ l-kamp u telaq lejn Gilgħad.
23Xħin qorob lejn Baskama qatel lil Ġonatan, u difnu hemm.
24Trifon, imbagħad, dar lura u mar lejn pajjiżu.
Id-difna ta’ Ġonatan (142 QK)25Imbagħad Xmun bagħat iġib l-għadam ta’ ħuh Ġonatan, u difnu f’Modin, il-belt ta’ missirijietu.
26U Iżrael kollu bkieh biki kbir u għamlu luttu sħiħ għal ħafna ġranet.
27U Xmun tella’ fuq il-qabar ta’ missieru u ħutu monument għoli li jidher mill-bogħod, b’ġebel minġur minn wara u minn quddiem.
28Waqqaf seba’ piramidi, waħda biswit l-oħra, għal missieru, għal ommu u għall-erba’ ħutu.
29U dawn il-piramidi żejjinhom bis-sengħa: dawwarhom b’kolonni kbar u mal-kolonni dendel trofej tal-gwerra b’tifkira għal dejjem, u qrib it-trofej naqqax ġfien li jistgħu jarawhom dawk kollha li jkunu jbaħħru.
30Dan hu l-musulew li bena f’Modin, u li għadu hemm sal-lum.
Ir-rebħa tal-indipendenza tal-Lhudija (142 QK)31Trifon mexa bl-ingann mas-sultan żagħżugħ Antijoku u qatlu.
32U beda jsaltan floku u xidd il-kuruna tal-Asja f’rasu u ġieb ħsara kbira fuq l-art.
33Xmun bena l-fortizzi tal-Lhudija, dawwarhom b’torrijiet għolja u swar kbar, bibien u żbarri, u qiegħed fihom provvisti tal-ikel.
34Imbagħad Xmun għażel lil xi wħud u bagħathom għand is-sultan Demetriju jitolbuh jaħfrilhom it-tribut fuq il-pajjiż, għax kulma kien għamel Trifon ma kienx ħlief serq.
35U għal dawn il-proposti s-sultan Demetriju bagħat iwieġbu u kitiblu din l-ittra:
36“Is-sultan Demetriju lil Xmun, qassis il-kbir u l-ħabib ta’ slaten, u lill-anzjani u l-ġens tal-Lhud, sliem.
37Aħna lqajna l-kuruna tad-deheb u l-palma li intom bgħattulna. Aħna lesti li nagħmlu paċi għal dejjem magħkom u niktbu lill-uffiċjali inkarigati jaħfrulkom it-tribut.
38U kulma ddeċidejna għalikom jibqa’ jseħħ, u l-fortizzi li bnejtu jkunu tagħkom.
39Naħfrulkom kulma nsejtu u kulma nqastu tħallsu sal-lum u t-taxxa tal-kuruna li għandkom tagħtuna; jekk imbagħad hemm xi piż ieħor fuq Ġerusalemm ma jitħallasx iżjed.
40Jekk hemm xi wħud fostkom tajbin biex jinkitbu mal-għases tagħna, ħa jinkitbu, u jkun hemm is-sliem bejnietna.”
41Hekk fis-sena 170 tneħħa l-madmad tal-ġnus minn fuq Iżrael,
42u l-poplu beda jikteb fid-dokumenti u fil-kuntratti: “Fl-ewwel sena ta’ Xmun, il-qassis il-kbir, ġeneral u kap tal-Lhud.”
Ir-rebħiet ta’ Xmun (141 QK)43F’dak iż-żmien Xmun waqqaf il-kamp f’Geżer, u dawwarha bl-eżerċtu. Bena magna tal-gwerra, ressaqha lejn il-belt, fetaħ selħa f’torri u ħatfu f’idejh.2 Mak 10,32-38.
44U dawk li kienu fil-magna qabżu għal ġol-belt, u qamet taħbila kbira fiha.
45In-nies tal-belt telgħu bin-nisa u t-tfal tagħhom fuq is-swar, bi lbieshom imċarrat, u bdew jgħajtu b’leħen qawwi u jitolbu lil Xmun jagħtihom idu
46u jgħidu: “Iġġibx ruħek magħna skont ħżunitna, iżda skont il-ħniena tiegħek.”
47Xmun ġietu ħniena minnhom u waqqaf il-ġlied. Imma keċċiehom mill-belt, saffa d-djar fejn kien hemm l-idoli, imbagħad daħal fiha bl-għana ta’ innijiet u radd il-ħajr.
48U neħħa minnha kull xorta ta’ tinġis u ġieb jgħammru fiha nies li kienu jħarsu l-liġi, iffortifikaha u bena fiha dar għalih.
49Dawk li kienu fl-Akra, Ġerusalemm, ma setgħux joqogħdu jiġġerrew ’l hemm u ’l hawn mal-pajjiż, jixtru u jbigħu, u għalhekk għafashom l-għaks u ħafna minnhom mietu bil-ġuħ.
50Għalhekk talbu lil Xmun jagħtihom idu, u hu tahielhom. Imma keċċiehom ’il barra minn hemm u naddaf l-Akra mill-qżiżijiet tagħhom.
51U daħlu fiha fit-tlieta u għoxrin tat-tieni xahar tas-sena 171 bl-għana ta’ tifħir, bil-palm, biċ-ċetri, biċ-ċimbali, bl-arpi, bl-innijiet u għana għax kien inqered għadu kbir minn ġo Iżrael.1 Mak 1,36; Ġw 12,13.
52U Xmun ordna li kull sena jgħaddu dan il-jum fil-ferħ. U saħħaħ l-għolja tat-tempju ħdejn l-Akra, u beda jgħammar fiha hu u niesu.
53U Xmun ra li ibnu Ġwanni sar raġel, u għamlu kap tal-eżerċtu. Dan mar jgħammar f’Geżer.
Who We AreWhat We EelieveWhat We Do
2025 by iamachristian.org,Inc All rights reserved.
