MIKEA 5 - Maltese Bible with DC

Kapitlu 5

1Imma int, Betlehem ta’ Efrata,

ċkejkna fost il-familji ta’ Ġuda,

minnek għad joħroġli

dak li jkun prinċep f’Iżrael;

hu għandu l-bidu tiegħu mill-qedem,

sa minn dejjem ta’ dejjem.

2Għalhekk il-Mulej jitlaqhom

sa meta teħles dik li hi fl-uġigħ tal-ħlas;

imbagħad il-bqija ta’ ħutu jerġgħu lura

fost ulied Iżrael.

3U hu joqgħod jirgħa l-merħla tiegħu

bil-qawwa tal-Mulej,

bil-glorja ta’ isem il-Mulej, Alla tiegħu.

U huma jgħammru fiż-żgur,

għax issa tkun kbira setegħtu,

sa trufijiet l-art.

4U dan ikun is-sliem!

Il-Lhud qalbhom qawwija

L-Assirja, jekk tidħol f’pajjiżna,

u jekk tirfes fil-kastelli tagħna,

inqajmu għaliha seba’ rgħajja,

u tmien prinċpijiet mill-poplu.

5Huma jirgħu ’l-Assirja bis-sejf,

u l-art ta’ Nimrod bix-xwabel misluta.

U jeħlisna mill-Assirja,

jekk din tidħol f’pajjiżna,

u jekk tirfes fuq artna.

Post il-bqija fost il-ġnus

6U jkun il-fdal ta’ Ġakobb fil-ġnus,

fost kotra ta’ popli

bħan-nida li tiġi mill-Mulej,

bħall-irxiex tax-xita fuq il-ħaxix,

li ma jistennew xejn minn ħadd,

lanqas jittamaw fil-bnedmin.

7U jkun il-fdal ta’ Ġakobb fil-ġnus fost kotra ta’ popli,

bħal iljun qalb il-bhejjem tal-foresta,

bħal ferħ ta’ ljun fost merħliet ta’ nagħaġ,

li, meta jgħaddi, jgħaffeġ u jqatta’,

u ħadd ma jeħlisha minn taħt idejh.

8Ħa tintrefa’ idek kontra min jeħodha miegħek,

u jintemmu l-għedewwa kollha tiegħek.

Il-Mulej iwarrab kull tiġrib

9U jiġri f’dak il-jum,

oraklu tal-Mulej,

li ntemm iż-żwiemel tiegħek minn ġo nofsok,

neqred il-karrijiet tiegħek,

10intemm il-bliet ta’ pajjiżek,

inġarraf is-swar tiegħek kollha,

11intemm kull seħer minn idek,

u bassara ma jkollokx iżjed;

12inkisser il-plieri u l-istatwi tiegħek minn ġo nofsok,

xbihat allatek nagħmilhom ħerba,

13intemm ix-xbihat tiegħek tal-Asera,

u ma tinxteħetx aktar fl-art

quddiem l-opri ta’ jdejk.

14U b’korla u saħna kbira nitħallas

mill-ġnus li ma jkunux iridu jisimgħu.