GĦAMOS 1 - Maltese Bible with DC

Kapitlu 1Il-ħaqq tal-Mulej kontra l-ġnus

1Kliem Għamos, li kien mir-rgħajja ta’ Tekugħa.

Dak li ra dwar Iżrael fi żmien Għużżija,

sultan ta’ Ġuda,

u fi żmien Ġerobogħam bin Ġowas,

sultan ta’ Iżrael,

sentejn qabel it-terremot.

2Hu qal: “Il-Mulej iriegħed minn Sijon,

u jsamma’ leħnu minn Ġerusalemm;

dbielet il-ħdura tal-mergħat tar-rgħajja

u nixfet il-quċċata tal-Karmel.”Damasku

3Dan jgħid il-Mulej:

“Għal tliet dnubiet ta’ Damasku,

erbgħa anzi,’

ma rreġġax lura kelmti,

għax dirsu lil Gilgħad bi xtabi tal-ħadid.

4Nibgħat in-nar fid-dar ta’ Ħażajel

u jeqred il-palazzi ta’ Benħadad;

5inkisser l-istaneg ta’ Damasku,

u neqred lil dawk li jgħammru f’wied Awen

u ’l dak li jżomm ix-xettru f’Bet-għeden;

u l-poplu tas-Sirja jittieħed f’Kir,”

jgħid il-Mulej.Gaża

6Dan jgħid il-Mulej:

“Għal tliet dnubiet ta’ Gaża,

erbgħa anzi,

ma rreġġax lura kelmti,

għaliex kaxkru fl-eżilju poplu sħiħ

biex jagħtuh f’idejn Edom;

7nibgħat in-nar fuq is-swar ta’ Gaża,

u jeqred il-palazzi kollha tagħha;

8neqred lil dawk li jgħammru f’Asdod,

u ’l dak li jżomm ix-xettru f’Askalon;

u ndawwar idejja għal fuq Għekron,

u jintemmu l-fdal tal-Filistin,”

jgħid il-Mulej Alla.Tir

9Dan jgħid il-Mulej:

“Għal tliet dnubiet ta’ Tir,

erbgħa anzi,

ma rreġġax lura kelmti,

għaliex kaxkru fl-eżilju poplu sħiħ

biex jagħtuh f’idejn Edom,

u ma ftakrux fil-patt tal-aħwa;

10nibgħat in-nar fuq is-swar ta’ Tir,

u jeqred il-palazzi tagħha.”

Edom

11Dan jgħid il-Mulej:

“Għal tliet dnubiet ta’ Edom,

erbgħa anzi,

ma rreġġax lura kelmti,

għaliex għamel għal ħuh bis-sejf,

u warrab kull ħniena,

u żamm għadbu għal dejjem,

u l-qilla tiegħu żammha sal-aħħar;

12għalhekk nibgħat in-nar f’Teman

u jeqred il-palazzi ta’ Bosra.”

Għammon

13Dan jgħid il-Mulej:

“Għal tliet dnubiet ta’ wlied Għammon,

erbgħa anzi,

ma rreġġax lura kelmti,

għaliex ċarrtu ħdan in-nisa tqal ta’ Gilgħad,

biex iwessgħu trufijiet arthom;

14inqabbad in-nar fuq is-swar ta’ Rabba,

u neqred il-palazzi tagħha,

b’għajjat f’jum it-taqbida,

u b’tempesta f’jum ir-riefnu;

15u s-sultan tagħhom imur fl-eżilju,

hu u l-prinċpijiet tiegħu miegħu,”

jgħid il-Mulej.