LAMENTAZZJONIJIET 4 - Maltese Bible with DC

Kapitlu 4Il-ġuħ ta’ Ġerusalemm

1Kif ittappan id-deheb,

kif tbiddel id-deheb fin!

Il-ġebel jinsab imxerred

f’ras kull triq.

2Ulied Sijon għeżież,

mitqilhom deheb jiswew!

Kif saru issa qishom biċċa xaqquf,

xogħol id il-fuħħar!

3Imqar ix-xakalli jagħtu sidirhom,

u jreddgħu l-frieħ tagħhom.

Bint il-poplu tiegħi kiefra

bħan-ngħama fid-deżert.

4Ilsien it-tarbija tal-ħalib,

weħel mas-saqaf ta’ ħalqha,

minħabba l-għatx;

it-tfal jittallbu l-ikel,

imma ma jagħtihom ħadd.

5Dawk li kienu jieklu t-tajjeb,

issa bil-ġuħ fit-toroq;

dawk li kienu mrobbija fil-porpra,

issa jitmiegħku fiż-żibel.

6Id-dnub ta’ bint il-poplu tiegħi

akbar mill-ħtija ta’ Sodoma,

li nqalbet f’waqt wieħed,

bla ma ħadd meddilha jdejh.

7Jiddu aktar mis-silġ kienu prinċpijietha,

bojod aktar mill-ħalib;

ġisimhom aħmar aktar mill-qroll,

persunithom bħas-saffir.

8Imma issa wiċċhom iswed aktar mid-dlam,

ma jingħarafx fit-toroq;

ġildithom weħlet ma’ għadamhom,

ibbieset daqs l-għewied.

9Ħabtuha aħjar il-maqtulin bix-xabla

minn dawk li nqerdu bil-ġuħ,

li ntemmu bil-mod, bħalkieku midrubin,

minħabba n-nuqqas ta’ wċuħ l-art.

10In-nisa, minkejja li ħanina,

sajru ’l uliedhom b’idejhom stess,

saru ikilhom,

dakinhar li tkissret bint il-poplu tiegħi.

11Il-Mulej temm il-qilla tiegħu,

sawwab saħnet il-korla tiegħu;

u kebbes in-nar f’Sijon,

u qerdilha s-sisien tagħha.

12Qatt ma emmnu slaten id-dinja,

u dawk li jgħammru fl-art,

li qatt jidħol gwerrier jew għadu

minn bwieb Ġerusalemm.

Il-profeti foloz

13Minħabba ħtijiet il-profeti tagħha,

u dnubiet il-qassisin tagħha,

li xerrdu fiha d-demm tal-ġusti.

14Kienu jixxenglu bħal għomja fit-toroq,

u mċappsa kollha demm,

u lbieshom ħadd ma sata’ jmiss.

15“Warrbu! Ja mniġġsin!” kienu jgħidulhom;

“Warrbu! Warrbu! La tmissuhomx!”

Għad jaħarbu u jiġġerrew fost il-ġnus,

imma n-nies jgħidu:

“Imkien ma jibqgħu.”

16Il-Mulej stess xerridhom,

aktar lejhom ma jħarisx;

ma kienx hemm ġieħ għall-qassisin,

lanqas ħniena għax-xjuħ.

L-aħħar jiem tan-nazzjon

17Għajnejna nfnew, kemm se ndumu

nħarsu għalxejn għall-għajnuna.

Mill-għases tagħna għarrixna

għall-poplu li ma jistax jgħinna.

18Iqisulna l-passi tagħna,

li ma nistgħux nimxu fi triqatna.

Qorob tmiemna, magħduda jiemna,

għax wasal tmiemna.

19Ġrew warajna eħfef

mill-ajkli tas-smewwiet.

Ġrew warajna qalb il-muntanji,

issajjawlna fid-deżert.

20In-nifs ta’ mnifsejna, il-midluk tal-Mulej,

inqabad fil-ħofor tagħhom.

Taħt id-dell tiegħu ngħidu:

“Nistgħu ngħixu fost il-ġnus.”

21Ifraħ u thenna, bint Edom,

int li tgħammar f’art Għus.

Imma għalik ukoll għad jgħaddi l-kalċi,

għad tisker u titgħarwen.

22Intemm dnubek, Bint Sijon,

ma jżommokx iżjed fl-eżilju.

Imma dnubek, bint Edom, jikkastigah;

dnubietek għad jikxifhomlok.