LAMENTAZZJONIJIET 1 - Maltese Bible with DC

Kapitlu 1Il-ħerba ta’ Ġerusalemm

1Ah! Kif inhi weħidha,

il-belt li kienet tiżgħed bin-nies!

Saret bħal armla

l-kbira fost il-ġnus!

Is-sidt fost l-ibliet,

il-ħaraġ ikollha tħallas.

2Billejl tibki biki tad-demm,

dmugħha jġelben ma’ ħaddejha.

Lil ħadd m’għandha jfarraġha,

minn fost l-egħżeż tagħha;

ħbiebha ttradewha,

u sarulha għedewwa.

3Tela’ Ġuda minħabba l-għaks,

u l-jasar iebes,

jgħammar fost il-ġnus

bla ma jsib mistrieħ.

Dawk kollha li ġrew warajh

laħquh meta kien fl-hemm.

4It-toroq ta’ Sijon jibku,

għall-festi ħadd m’għadu jmur.

Bibienha kollha ħerba;

il-qassisin jitniehdu;

ix-xebbiet tagħha mnikkta,

u hi mgħargħra fl-imrar.

5Dawk li ħaqruha marru minn fuq,

stagħnew l-għedewwa tagħha.

Il-Mulej għakkisha

minħabba l-kotra ta’ dnubietha.

It-tfal tagħha marru fl-eżilju,

misjuqa mill-għadu tagħhom.

6U għeb minn fuq bint Sijon

ġmielha kollu,

il-kbarat tagħha saru bħaċ-ċriev,

il-mergħa ma sabux;

telqu bla saħħa,

quddiem is-sewwieq tagħhom.

7Ġerusalemm tiftakar,

f’jiem l-hemm u l-imrar tagħha,

fil-ġid għażiż li kien tagħha,

sa mill-qedem żminijiet,

meta l-poplu tagħha waqa’ f’idejn l-għadu,

u ħadd ma kien hemm biex jgħinha.

Rawha l-għedewwa tagħha

u ddieħku b’qerditha.

Dnub Ġerusalemm

8Ġerusalemm dinbet bil-kbir,

għalhekk saret ħaġa moqżieża;

stmellewha dawk li kienu jfaħħruha,

għax raw l-għera tagħha.

Hi stess titkarrab,

u ddawwar wiċċha ’l hemm.

9It-tingiż ma’ djulha,

ma ħasbet qatt fi tmiemha.

Għalhekk waqgħetha tgħaġġbek,

ħadd m’għandha min isalvaha.

“Ħares, Mulej, lejn il-miżerja tiegħi,

għax l-għadu għelibni.”

10L-għadu medd idejh

għall-ġid kollu l-għażiż tagħha.

Rat il-ġnus deħlin fis-santwarju tagħha,

li int kont għedt ma jidħlux fih

waqt il-ġemgħat tiegħek.

11Il-poplu kollu tagħha jokrob,

u jfittex il-ħobż.

Jibdlu ġidhom l-għażiż mal-ikel,

sabiex jinħjew.

“Ħares, Mulej, ara sewwa,

kif sfajt imkagħbra.

12U intom ilkoll li għaddejjin mit-triq,

ħarsu sewwa u araw,

jekk hawnx hemm bħal hemmi,

li waqa’ fuqi;

li bih il-Mulej għabbieni

fil-jum ta’ saħnet għadbu.

13Xeħetli n-nar mill-għoli,

nifidli sa ġo għadmi;

firex xibka għal riġlejja

u ġagħalni nerġa’ lura;

u għamel minni ħerba sħiħa,

għamilli qalbi sewda,

mifnija l-jum kollu.

14Niseġ madmad minn dnubieti,

b’idejh stess baramhom;

taqqluli għonqi.

Neħħieli saħħti;

irħieni l-Mulej f’idejhom;

ma niflaħx inqum.L-abbandun ta’ Ġerusalemm

15“Iddieħak bil-qalbiena tiegħi,

Sidi li kien ġo nofsi;

sejjaħ kontrija ġemgħa

biex ifarrak iż-żgħażagħ tiegħi;

għaffeġ is-Sid bħalkieku f’magħsar,

ix-xebba, bint Ġuda.

16Għalhekk jien imbikkija,

u d-dmugħ iġelben minn għajnejja;

għax tbiegħed minni

min isabbarni u jaħjini.

Uliedi ħerba

għax rebaħ l-għadu.”

17Sijon meddet idejha,

imma m’hemmx min ifarraġha.

Il-Mulej ordna għal Ġakobb,

li l-ġirien tiegħu jdawruh;

u saret Ġerusalemm,

koċċ qżież ġo nofshom.

18“Ġust hu l-Mulej,

għax jien irvellajt kontra kelmtu.

Isimgħu, mela, popli lkoll kemm intom,

u araw in-niket tiegħi;

ix-xebbiet u ż-żgħażagħ tiegħi

fl-eżilju lkoll marru.

19Il-maħbubin tiegħi sejjaħtilhom,

imma huma daħku bija.

Il-qassisin u l-anzjani tiegħi fil-belt intemmu,

huma u jfittxu l-ikel,

biex jerġgħu jieħdu r-ruħ.

20Ara, Mulej, xi dwejjaq għandi,

imbaqbqa ġewwinija,

imħawda qalbi ġewwa fija,

għax ma ridt nisma’ b’ebda mod.

Barra teqred ’l ulied ix-xabla,

u ġewwa l-mewt.

21Isimgħuni nitniehed,

u ħadd ma jsabbarni.

Semgħu l-għedewwa bil-ħsara tiegħi,

u ferħu b’kulma int għamiltli.

Ġib il-jiem li int ħabbart,

ħalli jiġrilhom bħali.

22Ħa jiġi quddiemek il-ħażen kollu tagħhom,

u għamlilhom kif għamilt lili

għal dnubieti kollha,

għax l-ilfiq tiegħi kbir,

u qalbi nfniet.”