PROVERBJI 2 - Maltese Bible with DC

Kapitlu 2Il-ġid tal-għerf

1Ibni, jekk int tilqa’ kliemi, u

taħżen ġo fik il-kmandamenti tiegħi

2billi tagħti widen għall-għerf,

u tħalli lil moħħok jifhem sewwa;

3jekk issejjaħ l-għerf,

u tgħolli leħnek għall-fehma t-tajba;

4jekk tfittex l-għerf bħall-fidda,

u tħaffer għalih bħal teżor moħbi;

5imbagħad tifhem il-biża’ tal-Mulej,

u ssib it-tagħrif ta’ Alla.

6Għax il-Mulej jagħti l-għerf,

minn fommu ġej it-tagħrif u d-dehen.

7Hu jaħżen l-għajnuna għal min hu sewwa,

hu tarka għal min jimxi bla ħtija;

8hu jħares it-triqat tal-ġusti,

u jgħasses it-triq tat-twajbin tiegħu.

9Imbagħad int tifhem il-ħaqq u s-sewwa,

u timxi f’kull triq li hi tajba.

10Għax l-għerf jidħollok f’moħħok,

u t-tagħrif ikun l-għaxqa ta’ qalbek.

11L-għaqal jgħasses fuqek,

il-fehma tajba tħarsek,

12teħilsek minn triq il-ħażen,

minn nies ta’ kliem il-għawġ;

13li tilfu t-triq it-tajba,

biex jimxu f’toroq mudlama;

14li l-hena tagħhom jagħmlu l-ħażen,

l-għaxqa tagħhom il-ħażen mill-agħar;

15nies li triqathom mgħawġa,

u l-mixi tagħhom barra mit-triq.

16Jeħilsek l-għerf minn mart ħaddieħor,

mill-mara barranija li tmelles bi kliemha,

17li twarrab sieħeb żgħożitha,

u tinsa l-patt li għamlet ma’ Alla tagħha;

18darha lejn il-mewt nieżla,

u l-mixi tagħha lejn Art l-Imwiet;

19ħadd ma jmur għandha u jerġa’ lura,

jew jerġa’ jaqbad triq il-ħajja.

20Int, mela, imxi fi triq it-tajbin,

u żomm ma’ mogħdijiet il-ġusti;

21għax it-tajbin jgħammru fl-art,

u n-nies sewwa joqogħdu fiha;

22imma l-ħżiena mill-art jitqaċċtu,

u l-qarrieqa jinqalgħu minnha.