IL-KTIEB TAL-GĦERF 11 - Maltese Bible with DC

Kapitlu 11Fid-deżert tas-Sinaj

1L-għerf mexxiehom ’il quddiem f’għemilhom

permezz ta’ profeta qaddis.

2Huma mxew f’deżert bla nies,

waqqfu l-għerejjex f’xagħri bla triqat.

3Waqfu lill-għedewwa, żammew iebes lil min ħadha kontrihom.

4Meta kellhom l-għatx, lilek talbu.

U int tajthom l-ilma mill-blata wieqfa;

taffejtilhom l-għatx minn ħaġra samma.

5Dak li bih tgħakksu l-għedewwa tagħhom,

lilhom swielhom ta’ ġid fi ħtiġiethom.Il-kastig tal-Eġizzjani

6Flok dik in-nixxiegħa tax-xmara li ma taqtax,

imdardra b’demm imħassar,

7bi tpattija għall-ordni tal-qtil tat-trabi,

int tajthom kotra ta’ ilma li huma qatt ma basru.

8U hekk b’dak l-għatx tagħhom

urejthom kif kont għakkist l-għedewwa.

9Għax meta int ġarrabthom, għalkemm bil-ħniena widdibthom,

fehmu kemm batew il-ħżiena mgħakksa bil-qilla.

10Lil dawk ġarrabthom biex twissihom bħal missier;

lill-oħrajn ġibthom quddiemek u kkundannajthom bħal sultan qalil.

11F’arthom u barra minn arthom xorta kienu mgħakksin:

12għax għalja fuq oħra ġiet fuqhom,

u bkew għat-tifkira tal-imgħoddi.

13Meta semgħu li bis-saħħa tat-tbatija tagħhom,

kisbu l-ġid l-oħrajn, raw il-qawwa ta’ driegħ il-Mulej.

14Lil dak li qabel keċċewh ’il barra, irmewh u maqdruh,

meta għadda kollox, stagħġbu bih;

l-għatx li kellhom huma ma kienx bħal tat-tajbin.

15Għal ħsibijiethom, kollha ħażen u bla sens,

li qarrqu bihom u ġagħluhom iqimu sriep bla raġuni u dud bla siwi,

int bgħatt fuqhom bi tpattija qtajja’ ta’ ħlejjaq bla raġuni,

16biex jagħrfu li d-dnub tal-bniedem hu l-kastig tiegħu.

17Għax setgħet ukoll idek setgħana,

li sawret id-dinja minn ħaġa bla sura,

tibgħat fuqhom qatgħa orsijiet jew iljuni feroċi,

18jew taħlaq mill-ġdid bhejjem qliel ħadd ma jaf bihom,

jarmu n-nar minn imnifsejhom jew joħorġu duħħan ibaqbaq,

jew jitfgħu bħal beraq xrar tal-biża’ minn għajnejhom.

19Dawn mhux biss kienu jistgħu jeqirduhom għalkollox,

imma d-dehra tal-biża’ tagħhom biss kienet toqtolhom.

20U mqar mingħajr dawn, nefħa waħda biss setgħet tmiddhom,

minħabba l-ħaqq tiegħek li jiġri wrajhom,

u n-nifs setgħan tiegħek li jtajjarhom;

imma int ordnajt kollox bil-qjies, bl-għadd u bl-użin.

21Għax int dejjem għandek setgħa kbira,

u min jista’ jeħodha kontra s-setgħa ta’ driegħek?Il-ħniena ta’ Alla

22Quddiemek id-dinja kollha qisha traba fil-miżien,

jew qatra nida tal-għodwa li tinżel fuq l-art.

23Iżda int tħenn għal kulħadd, għax tista’ kollox;

int tagħlaq għajnejk għal dnubiet il-bnedmin biex huma jindmu.

24Għax int tħobb il-ħlejjaq kollha,

u xejn ma tistmell minn kulma għamilt;

li kien hemm xi ħaġa li stajt tobgħodha, int ma kontx tagħmilha.

25Kif setgħet tibqa’ xi ħaġa fid-dinja kieku int ma ridthiex?

Jew kif setgħet iżżomm, kieku int ma sejjaħtilhiex?

26Imma int, o Sid li tħobb kulma jgħix,

lil kulħadd tagħder, għax kollox huwa tiegħek.