ĠOB 15 - Maltese Bible with DC

Kapitlu 15It-tieni diskors ta’ Elifaż

1Wieġeb Elifaż it-Temani u qal:

2“Huwa l-għaref iwieġeb b’argumenti fiergħa,

u joqgħod jimraħ fuq ir-riħ Xlokk?

3Se jieħu raġun b’diskors bla fejda,

u bi kliem li ma jiswa għal xejn?

4Int qed tħassar il-biża’ ta’ Alla,

u ġġib fix-xejn ir-reliġjon.

5Billi dnubek inebbaħ lil fommok

u għoġbok tħaddem ilsien il-ħżunija,

6fommok stess jgħaddik b’ħati, mhux jiena,

huma xufftejk li jixhdu kontrik.

7Twelidt int qabel il-bnedmin?

Tnissilt inti qabel l-għoljiet?

8Jaqaw kont tisma’ fil-kunsill ta’ Alla,

u żammejt għalik waħdek l-għerf?

9X’taf int li ma nafuhx aħna?

X’tagħrif għandek li qabżilna?

10Għandna fostna xjuħ meqjuma

ikbar fiż-żmien minn missierek.

11Mhu xejn għalik il-faraġ ta’Alla,

u l-kliem tagħna li jieħdok bil-ħlewwa?

12Għaliex tħalli l-passjoni tegħlbek?

L-għala tberraq l-għajnejn tiegħek?

13Għala ddawwar fuq Alla l-qilla tiegħek,

u titlaq minn fommok kliem bħal dan?

14X’inhu l-bniedem biex ikun safi,

bin il-mara biex ikun bla ħtija?

15Jekk anqas fl-anġli tiegħu Alla ma jafda,

u s-smewwiet mhumiex safja quddiemu,

16kemm inqas dil-ħlejqa moqżieża u mħassra,

il-bniedem li jixrob bħall-ilma l-ħażen?

17Ismagħni, Ġob, ħalli nurik,

u l-ħwejjeġ li rajt jien żgur nistqarrlek,

18dak li jgħidu l-għorrief tagħna,

u ma ħbewlhomx missirijiethom;

19dawk li lilhom weħidhom kienet l-art mogħtija,

u ebda barrani ma tħallat magħhom.

20Il-ħażin ħajtu kollha jieħu ġo qalbu,

magħdudin is-snin merfugħa għal bin id-dnewwa.

21Jidwu f’widnejh ħsejjes ta’ biża’,

fis-sliem jistħajjel ġej għalih xi qerried.

22M’għandux tama li mid-dlam se jeħlisha,

hu li jqis ruħu mmarkat għas-sejf;

23mitfugħ bħala ikel għall-isqra,

jaf li maqtugħa l-qerda tiegħu.

24Ibeżżgħu jum id-dlam,

jaħkmuh in-niket u d-dwejjaq

bħal sultan lest għat-taqbida.

25Għax rafa’ idu kontra Alla,

ried jisfida lil Xaddaj.

26Ġera għalih kollu mżarġan,

bil-ħxuna tat-tarki bbuzzati tiegħu.

27Għax mela bis-simna wiċċu,

u taqqal ġenbejh bis-sonża.

28Imur jgħammar fi bliet meqruda

u fi djar mitluqa min-nies,

u għoddhom se jiġġarrfu.

29Ma jistagħniex, lanqas idum riżqu,

ma jifrixx ġidu ’l hemm mill-qabar.

30Mid-dlam żgur ma jeħlishiex;

inixxef in-nar iż-żraġen tiegħu,

u r-rimi tiegħu jtajru r-riħ.

31Qis li ħadd ma jafda fil-frugħa u jitqarraq,

għax frugħa jkun il-ħlas li jieħu.

32Jinxfu qabel iż-żmien iż-żraġen tiegħu,

il-friegħi tiegħu ma jħaddrux aktar.

33Iwaqqa’ bħad-dielja l-għeneb nej,

jobżoq bħaż-żebbuġa n-nwar tiegħu.

34Le, ma jkollhiex nisel ir-razza tal-ħżiena,

id-djar tal-qarrieqa jeqridhom in-nar.

35Inisslu l-inkwiet u jildu l-ħsara,

u ġufhom bit-tqala tal-qerq.”