PROVERBJI 30 - Maltese Bible with DC

Kapitlu 30Kliem ta’ Agur

1Kliem ta’ Agur bin Ġaki, minn Massa.

Hekk jgħid il-bniedem: “Għejejt, O Alla,

għejejt, O Alla, u nħossni mifni.

2Tassew, iblah jien aktar minn kulħadd,

m’għandix fija l-għaqal tal-bniedem.

3L-għerf jien ma tgħallimtux,

u ’l Dak li hu Qaddis ma nagħrfux.

4Min qatt tala’ s-sema u raġa’ niżel?

Min ħakem ir-riħ fil-keffa ta’ idu?

Min ġabar l-ilma fi ħwejġu?

Min ħażżeż it-trufijiet kollha tal-art?

Taf x’jismu, u x’jismu ibnu?

5Kull kelma ta’ Alla għaddiet mill-prova;

hu tarka għal kull min jistkenn fih.

6Iżżid xejn ma’ kliemu,

għax hu jċanfrek u jgiddbek.

7Dawn it-tnejn jien nitlob mingħandek,

tiċħadhomlix qabel ma mmut:

8Biegħed minni l-qerq u l-gideb;

tagħtinix la faqar u lanqas għana,

iżda agħtini l-ikel li neħtieġ.

9Għax jekk ikolli bix-xaba’, nista’ niċħdek,

u ngħid: “Min hu l-Mulej?”

Jekk niftaqar, nasal biex nisraq

u nkasbar isem Alla.

10Tgħidx kontra l-qaddej ma’ sidu,

għax hu jisħtek, u tħallasha qares.

11Xi wħud jisħtu ’l missierhom,

u ’l ommhom ma jberkuhiex.

12Xi wħud jidhrilhom li huma safja,

imma ma tnaddfux minn ħmieġhom.

13Oħrajn, kemm għandhom għajnejhom merfugħa,

u x’ħarsa għandhom ta’ kburin!

14Xi wħud li għandhom snienhom sjuf

u drashom skieken;

jaħtfu l-fqir minn fuq l-art,

u l-imsejken minn fost il-bnedmin.

15Is-sangisuga għandha żewġt ibniet,

u dejjem jgħidu: “Tini, tini”.

Tlieta huma li qatt ma jixbgħu,

u r-raba’, li qatt ma tgħid: “Biżżejjed!”:

16Art l-Imwiet, il-ġuf bla wlied,

l-art niexfa bl-għatx,

u n-nar li qatt ma jgħid: “Biżżejjed!”

17Min jiddieħak b’missieru,

u jagħmel il-ħsieb li ma jismax minn ommu,

wara mewtu jaqlagħlu għajnejh iċ-ċawl,

u jikluh il-frieħ tas-seqer.

18Tliet ħwejjeġ huma tal-għaġeb għalija,

anzi erbgħa li ma nifhimhomx:

19it-triq tal-ajkla fl-ajru,

it-triq tas-serp fuq il-blat,

it-triq tal-ġifen f’nofs ta’ baħar,

it-triq ta’ raġel lejn xebba.

20Din hi l-ħajja tal-mara żienja:

tiekol u timsaħ ħalqha;

imbagħad tgħid: “Ma għamilt xejn ħażin.”

21Minħabba tlieta titriegħed l-art,

u r-raba’ ma tiflaħx għaliha:

22ilsir li jilħaq sultan,

iblah li jixba’ bil-ħobż,

23mara tiżżewweġ bla maħbuba,

u qaddejja li tilħaq flok sidtha.

24Erba’ ħwejjeġ huma l-iżgħar fl-art,

iżda huma wkoll l-aktar għorrief:

25in-nemel mhumiex qawwija,

iżda jħejju fis-sajf ikilhom;

26il-fniek selvaġġi huma bla saħħa,

iżda jagħmlu fil-blat il-bejta tagħhom;

27il-ġradijiet li m’għandhomx sultan,

iżda kollha jtiru mqassmin fi qtajja’;

28il-gremxula b’idek taqbadha,

iżda hi tidħol f’dar is-sultan.

29Tlieta għandhom mixja sabiħa,

u r-raba’ joħroġ b’bixra ta’ ġieħ:

30l-iljun, l-aqwa fost il-bhejjem,

li xejn ma jreġġgħu lura;

31is-serduq wieqaf, il-bodbod,

u s-sultan f’ras il-poplu tiegħu.

32Jekk tbellaht għax tkabbart,

jew jekk fassalt il-ħażen, qiegħed idek fuq fommok;

33għax jekk tagħsar il-ħalib, toħroġ il-baqta,

jekk tagħsar imnieħrek, joħroġ id-demm,

u jekk tagħsar l-għadab, joħroġ il-ġlied.