1Irroddlok ħajr, Mulej, sultan tiegħi,
u nfaħħrek, Alla Salvatur tiegħi,
irrodd ħajr lil ismek,
2għaliex int sirt kenn u għajnuna għalija,
u fdejtli ’l ġismi mit-telfien,
u min-nassa ta’ lsien giddieb
u minn xufftejn qarrieqa.
Quddiem dawk li daru għalija
kont ta’ għajnuna għalija u fdejtni,
3skont il-kobor tal-ħniena u l-isem tiegħek,
minn snien dawk li kienu lesti li jqattgħuni,
minn idejn dawk li kienu jfittxu li joqtluni,
mill-ħafna għawġ li ġarrabt,
4min-nar madwari li kien jifgani,
u minn qalb ħuġġieġa li ma qabbadthiex jien,
5mill-fond tal-ġewwieni ta’ Art l-Imwiet,
u minn ilsien iniggeż u kliem qarrieq -
6il-qlajja’ ta’ lsien ħażin quddiem is-sultan.
Ruħi kienet qorbot lejn il-mewt,
u ħajti kienet għoddha f’xifer il-qabar.
7Dawruni minn kull naħa,
u ma kienx hemm min jgħinni;
ħarist biex xi ħadd jagħtini l-għajnuna,
imma ma kienx hemm min.
8Imma ftakart fil-ħniena tiegħek, Mulej,
fl-għemejjel tiegħek fiż-żmien ta’ dari,
għax int teħles lil dawk li stennewk
u ssalvahom minn idejn l-għedewwa.
9Imbagħad għollejt mill-art it-talba tiegħi,
u tlabtek teħlisni mill-mewt.
10U sejjaħt lill-Mulej: “Mulej, int missieri,
titlaqnix f’jiem l-għawġ,
meta jiena bla għajnuna kontra l-kburin.
Infaħħar ismek il-ħin kollu,
u ngħannilek b’radd il-ħajr.”
11U int smajt it-talba tiegħi,
għax salvajtni mit-telfien,
u ħlistni minn żmien ikrah.
12Għalhekk irroddlok ħajr u nfaħħrek,
u nbierek l-isem tal-Mulej.
Poeżija fuq it-tiftix għall-għerf13Meta kont għadni żagħżugħ, qabel ma bdejt nivvjaġġa,
fittixt l-għerf bid-dieher fit-talb tiegħi.
14Quddiem it-tempju kont nitlob għalih,
u nibqa’ nfittxu sal-aħħar.
15Xħin tiżhar id-dielja
sa ma ssajjar l-għeneb,
qalbi kienet tithenna bl-għerf.
Meddejt riġli f’mogħdija dritta,
minn żgħożiti kont insus warajh.
16Tajtu ftit widen u ngħatali,
imma sibt għalija ħafna tagħlim.
17Bih imxejt ’il quddiem;
lil Min tani l-għerf glorja nagħtih.
18Għax għandi f’moħħi li nġib ruħi bl-għerf,
u sirt ħerqan għat-tajjeb u ma jkollix għax nistħi.
19Tħabatt ħafna biex nikseb l-għerf,
u ħarist il-Liġi bir-reqqa.
Erfajt idejja ’l fuq u bkejt
għax ma kontx nagħrfu.
20Mexxejt lili nnifsi lejn l-għerf
imma sibtu fis-safa.
Miegħu kont mill-ewwel għal qalbi,
u għalhekk ma nibqax waħdi.
21Kont imħeġġeġ ġo fija biex infittxu,
u għalhekk ksibt ħaġa tajba.
22Il-Mulej tani lsieni bi ħlas tiegħi,
u bih jien infaħħru.
23Ersqu lejja intom li m’għandkomx tagħlim,
u ħudu postkom fl-iskola tiegħi.
24Għaliex tgħidu li intom lura f’dawn il-ħwejjeġ,
u li rwieħkom huma bl-għatx għall-aħħar?
25Ftaħt fommi u tkellimt,
“Iksbu għalikom l-għerf bla ma tħallsu l-flus.
26Middu għonqkom għall-madmad tiegħu,
u qisu li ruħkom tilqa’ t-tagħlim.
Hu qrib biex issibuh.
27Araw b’għajnejkom kemm tħabatt ftit,
imma sibt għalija ħafna mistrieħ.
28Ixtru t-tagħlim b’somma kbira tal-fidda,
u tiksbu bih ħafna deheb.
29Jalla rwieħkom jifirħu fil-ħniena tal-Mulej
u ma tistħux fit-tifħir tiegħu.
30Aqdu dmirkom qabel jasal iż-żmien,
u l-Mulej iħallaskom fi żmienu.”
L-Għerf ta’ bin Sirak.
Who We AreWhat We EelieveWhat We Do
2025 by iamachristian.org,Inc All rights reserved.
