1Itolbu x-xita mingħand il-Mulej
meta tkun qorbot fl-aħħar:
il-Mulej li jagħmel il-beraq,
li jagħtihom il-ħalbiet tax-xita,
lill-bniedem il-ħaxix tar-raba’.
2Għax allat djarhom jgħidu kliem fieragħ;
dawk li jħabbru kellhom dehriet qarrieqa,
ifissru ħolm mhux minnu,
u għalxejn ifittxu jfarrġu.
Minħabba f’hekk tferrex bħal merħla l-poplu,
imsieken, għax m’għandhomx ragħaj.Iżrael meħlus jitraġġa’ lura
3“Xegħlet il-korla tiegħi għar-rgħajja,
u se nikkastiga lill-kapijiet.
Iva, il-Mulej tal-eżerċti jieħu ħsieb il-merħla tiegħu,
li hi d-dar ta’ Ġuda,
u jagħmilha bħal żiemel glorjuż tiegħu fit-taqbida.
4Minnha toħroġ il-ġebla tax-xewka, minnha l-puntal,
minnha l-qaws tat-taqbid, minnha kull kap.
5Flimkien ikunu bħal gwerrier
li jgħaffġu fit-tajn tat-toroq fit-taqbid,
jissaraw għax il-Mulej magħhom,
u r-rikkieba taż-żwiemel jitħawdu.
6Insaħħaħ dar Ġuda,
insalva dar Ġużeppi,
u nerġa’ nġibhom lura,
għaliex ħennejt għalihom;
u jkunu bħalkieku qatt ma ċħadthom,
għax jiena l-Mulej, Alla tagħhom,
u nagħtihom dak li talbuni.
7Imbagħad isir Efrajm bħal gwerrier qalbieni,
tithenna qalbhom bħalkieku bl-inbid;
uliedhom jaraw u jithennew,
u qalbhom tifraħ fil-Mulej.
8U nsaffrilhom biex niġmagħhom,
għax jiena fdejthom,
u jsiru kotrana bħalma kienu.
9Ukoll jekk xerridthom fost il-ġnus,
iżda mill-artijiet imbiegħda jibqgħu jiftakruni,
u jrabbu ’l uliedhom u jerġgħu lura.
10Nerġa’ nġibhom mill-art tal-Eġittu,
u niġmagħhom mill-Assirja;
indaħħalhom fl-art ta’ Gilgħad u fil-Libanu
u ma jinstabx wisa’ biżżejjed għalihom.
11Għad jaqsmu l-baħar tal-Eġittu,
u hu jraġġa’ lura ħalel il-baħar,
u jitnixxfu qigħan in-Nil.
Jitwaqqa’ t-tkabbir tal-Assirja,
lill-Eġittu jitneħħielu x-xettru.
12Inqawwihom fil-Mulej,
f’Ismu jkun il-ftaħir tagħhom,”
oraklu tal-Mulej.
Who We AreWhat We EelieveWhat We Do
2025 by iamachristian.org,Inc All rights reserved.
