ĠEREMIJA 12 - Maltese Bible with DC

Kapitlu 12L-ilmenti tal-Profeta

1Ikollok raġun int, Mulej, meta niddiskuti miegħek;

imma rrid inħaqqaqha miegħek:

Għaliex il-ħżiena jgawdu r-riżq,

u l-ħatjin kollha jgħixu fis-sliem?

2Tħawwilhom u jniżżlu l-għeruq,

jikbru u jagħmlu l-frott.

Int qrib fuq fommhom,

imma ’l bogħod minn qalbhom.

3Int, Mulej, tafni u tarani,

u tiflili qalbi.

Iġbidhom bħal nagħaġ għall-mewt,

żommhom għall-qatla.

4Kemm se ddum tinkedd l-art,

u l-ħaxix jinxef fir-raba’?

Minħabba l-ħażen ta’ min jgħammar fiha,

imutu l-bhejjem u t-tjur.

Għax huma jgħidu: “Ma jarax l-imġiba tagħna.”

5“Jekk tegħja tiġri ma’ rġiel jiġru,

kif se ttellaq maż-żwiemel?

Jekk int tintreħa f’art is-sliem,

x’se tagħmel fil-masġar tal-Ġordan?

6Imqar ħutek, dar missierek,

dawn ukoll iqarrqu bik;

dawn ukoll jgħajtu warajk bis-sħiħ,

tafdahomx meta jkellmuk bi kliem sabiħ.

7Ħallejt ’il dari, tlaqt ’il wirti,

ħallejt l-għaxqa ta’ qalbi f’idejn l-għedewwa tagħha.

8Għax wirti sar għalija bħal iljun fil-masġar:

għolla leħnu għalija u jien għalhekk nobogħdu.

9Għasfur ta’ lewn imżewwaq hu wirti għalija,

imdawwar mill-isqra minn kullimkien!

Ejjew inġemgħu, bhejjem kollha tax-xagħri,

ejjew għall-ikla!

10Ħafna rgħajja ħarbtu l-għalqa tad-dwieli tiegħi,

għaffġu fuq il-wirt tiegħi,

għamlu ħerba li twaħħax l-għalqa,

li kienet l-għaxqa tiegħi.

11Ħartuha u għamluha tbikkik quddiemi;

il-pajjiż kollu sar ħerba u ħadd ma jimpurtah.

12Fuq l-għoljiet għerja kollha tad-deżert ġew il-qerrieda,

għax il-Mulej għandu sejf qerriedi;

minn tarf sa tarf tal-art

ma hemmx sliem għal ebda ħaj.

13Żergħu l-qamħ u ħasdu x-xewk;

tħabtu għal xejn; jistħu mill-ħsad tagħhom,

minħabba l-qilla ta’ għadab il-Mulej.”

14Dan jgħid il-Mulej kontra l-ġirien ħżiena tiegħi, li messew il-wirt li jien tajt lill-poplu tiegħi Iżrael: “Arawni, se naqlagħhom minn arthom u d-dar ta’ Ġuda se naqlagħha minn nofshom.