ISAIJA 21 - Maltese Bible with DC

Kapitlu 21L-oraklu fuq id-deżert tal-baħar

1Oraklu fuq id-deżert tal-baħar:

Bħalma r-rwiefen jgħaddu maħruba min-Negeb,

hekk hu ġej mid-deżert, minn art tal-biża’!

2Viżjoni kiefra kienet murija lili.

Il-ħalliel jisraq; il-qerried jeqred!

Itla’ Għelam, assedja Medja!

Hawn jien biex insikket il-krib.

3Għalhekk inħossni mkexkex f’ġenbejja;

nitkagħweġ bħal mara fil-ħlas.

Inħossni mħawwad wisq biex nisma’,

imbellah wisq biex nara!

4Moħħi storda, qabadni t-tkexkix,

kont nixtieq li jaqa’ l-lejl,

u issa sirt nibża’ minnu!

5Ħejjew il-mejda, firxu l-ħasira,

jieklu u jixorbu.

Qumu, prinċpijiet, idilku t-tarki!

6Dan qalli l-Mulej:

“Mur qiegħed għassies,

ħa jħabbar dak li jara.

7U jekk jara rikkieb fuq karru b’żewġt iżwiemel;

rikkieb fuq ħmar, rikkieb fuq ġemel,

ħa jgħarrex sewwa,

b’reqqa l-aktar kbira.’

8U mbagħad l-għassies jgħajjat:

‘Fuq torri tal-għassa, sidi,

jien qiegħed binhar dejjem,

u wieqaf dejjem f’posti l-iljieli kollha.

9U ara, ġej wieħed riekeb,

fuq karru b’żewġt iżwiemel;

li beda jgħajjat u jgħid:

‘Waqgħet waqgħet Babilonja,

u magħha xbihat allatha

mfarrka fl-art.’Oraklu fuq Edom

11Oraklu fuq Edom:

Sejjaħli xi ħadd minn Xegħir:

“Għassies, fiex inhu l-lejl?

Għassies, fiex inhu l-lejl?”

12U l-għassies wieġeb:

“Għad jasal is-sebħ u l-lejl ukoll.

Jekk tridu tistħarrġu, stħarrġu.

Erġgħu ejjew?”

Oraklu fuq l-Għarabja

13“Oraklu fuq l-Għarabja:

Fil-masġar, fid-deżert għaddu l-lejl,

intom karwani tad-Dedanin!

14Ilqgħu lill-għatxanin, ġibulhom l-ilma,

intom li tgħammru f’art Tema,

ilqgħu bil-ħobż il-maħrubin.

15Għax minn quddiem ix-xabla ħarbu,

minn quddiem xabla misluta,

minn quddiem il-qaws miġbud,

minn quddiem il-qilla tal-battalja.

16Għax dan qalli Sidi: “Fi żmien sena,

kif jgħoddu s-snin ta’ ħaddiem mikri,

ikun għab is-sebħ kollu ta’ Kedar.

17U ftit li xejn jifdal

mill-arċieri qalbiena ta’ Kedar.’

Għax tkellem il-Mulej, Alla ta’ Iżrael.”