ĠOB 35 - Maltese Bible with DC

Kapitlu 35Alla mhuwiex indifferenti għal ġrajjiet il-bniedem

1Eliħu ssokta jgħid:

2“Taħseb int li dan huwa sewwa,

tgħid: ‘Jien għandi raġun, mhux Alla’,

3jew xħin tgħid: ‘X’jiswieli?

Fiex jien aħjar jekk ma nidnibx?’

4Għal dan jien hekk inwieġeb,

lilek u ’l ħbiebek f’daqqa:

5‘Erfa’ għajnejk lejn is-sema, ħares,

qis is-sħab kemm hu ogħla minnek!

6Jekk tidneb x’deni tagħmel lil Alla?

U mqar tkattar ħtijietek, x’tagħmillu?

7Jekk tagħmel is-sewwa x’tagħtih?

X’se jieħu b’daqshekk mingħandek?

8Lil bniedem bħalek tolqot ħżunitek,

lill-bnedmin ħutek jiswa s-sewwa tiegħek.

9Taħt it-toqol tal-moħqrija n-nies tgħajjat,

u kontra driegħ il-qawwijin titlob l-għajnuna.

10Iżda ħadd minnhom ma jgħid:

‘Fejn hu Alla li ħalaqni,

li jagħti l-wens billejl,

11li jgħallimna aktar mill-bhejjem tal-art,

u jagħmilna egħref mit-tajr tal-ajru.’

12Uħud jgħajtu iżda Hu ma jweġibx,

minħabba kburithom ta’ nies ħżiena.

13Kollu ta’ xejn, Alla ma jagħtix widen għall-kliem fieragħ,

Xaddaj ma jagħtix kasu.

14Kemm inqas, mela, xħin int tgħid li ma tilmħux,

li ressaqt kawża quddiemu u qed tistennieh,

15jew xħin tgħid li xejn ma tikkastiga l-korla tiegħu,

u li Hu ma jagħrafx sewwa l-ħtija?

16Tassew, fil-vojt Ġob jiftaħ ħalqu,

ipaċpaċ ħafna u bla sens.”